30.06.2026 | 23:28
«Ուիմբլդոն»․ Կարեն Խաչանովը մեկնարկել է հաղթանակով
Եվրոպան՝ COVID-19-ի իշխանության տակ․ սահմանափակումները խստացվում են
Քաղաքականություն
05.11.2020 | 11:39
Եվրոպական երկրները կրկին խստացնում են կորոնավիրուսի պատճառով սահմանափակումները։ Այսօրվանից երկրորդ համընդհանուր լոքդաունի է անցնում Մեծ Բրիտանիան։ Կիպրոսի իշխանությունները մինչև ամսվա վերջ ամբողջ երկրի տարածքում պարետային ժամ են սահմանել։ Մինչ այդ Չեխիայում, որտեղ արդեն գործում են սահմանափակումները, մեկ օրում մահացությունների թվի նոր հակառեկորդ է սահմանել, հաղորդում է vesti.ru-ն։
Հունաստանում միանգամից 3 հակառեկորդ է գրանցվել՝ վարակակիրների, մահացությունների և թոքերի արհեստական օդափոխության կարիք ունեցող մարդկանց թվի։ Մայիսից ի վեր առաջին անգամ երկու շաբաթով երկրում փակվում են բոլոր բարերը, ռեստորանները, սրճարանները, կինոթատրոններն ու թանգարանները։
Իտալիայում պարետային ժամ է սահմանվել 22:00-ից։ Ուսանողները հեռահար են ուսանում, թանգարանները, խաղասրահներն ու առևտրի կենտրոնները փակ են։
Հետ չի մնում նաև Լեհաստանը․ այստեղ ևս հիվանդացության և մահացության թվի հակառեկորդ է գրանցվել, հիվանդանոցներում ազատ մահճակալների, թոքերի օդափոխության արհեստական սարքերի, ինչպես նաև բժիշկների պակաս կա։
Հունգարիայում արտակարգ իրավիճակ է հայտարարվել։ Գիշերային ակումբերը փակվել են, քաղաքում ավտոկայանատեղիներն անվճար են դարձել, որպեսզի թեթևացվի տրանսպորտի հոսքը։
Սերբիան ի վիճակի չէ հաղթահարել դեպի հիվանդանոցներ հիվանդների հոսքը, բուժհաստատություններում գրեթե տեղ չկա։
Դանիայում վիրուսը ներթափանցել է երկրի խորհրդարան և կառավարություն։ Պատգամավորներից մի քանիսը վարակվել են, մեկը՝ հոսպիտալացվել, նախարարների կաբինետի մի մասը՝ վարչապետի հետ միասին, ինքնամեկուսացված է:
Ֆրանսիայում օրական ավելի քան 50 հազար մարդ է հիվանդանում կորոնավիրուսով: Վերակենդանացման բաժանմունքներում մահճակալների 70 տոկոսը զբաղված է, վերջին մի քանի շաբաթվա ընթացքում ծանր դեպքերի թիվը կրկնապատկվել է:
Տաթև Ֆռանգյան
