Ովքե՞ր են Սյունիքում Արցախի հարավային հատվածի կորստից խոսում․ Սեֆիլյանի ահազանգն ու «Իմ քայլի» արձագանքը․ ՏԵՍԱՆՅՈՒԹ

«Սասնա Ծռեր» համահայկական շարժման ղեկավար Ժիրայր Սեֆլյանի աղմկահարույց գրառումը, որի համաձայն՝ Սյունիքում փորձ է արվում տեղացիների շրջանում ձևավորել Արցախի հարավային հատվածի կորստի հետ հաշտվելու մթնոլորտ, իրականությանը չի համապատասխանում: Factor TV-ի հետ զրույցում պնդեցին Ազգային ժողովի «Իմ քայլը» խմբակցության՝ Սյունիքից ընտրված պատգամավորները:

Հիշեցնենք՝ Ժիրայր Սեֆիլյանն այսօր, իր բնորոշմամբ, զարմանալի և շատ վտանգավոր երևույթի մասին էր բարձրաձայնել, որը, ըստ նրա, տեղի է ունենում Սյունիքում։ Նա հայտարարել էր, թե շեշտը դրվում է տարիներ շարունակ քողարկված ձևով շրջանառված, իսկ այսօր արդեն ուղիղ կերպով բարձրաձայնվող կեղծ և հակահայ մի տեսակետի վրա, որ Արցախի հարավի տարածքը հայկական չէր և որ հայկական է ընդամենը Խորհրդային Հայաստանի վարչական սահմանով գծված տարածքը։ Թե ով է նման տեղեկություններ տարածում, փորձեցինք ճշտել Ժիրայր Սեֆիլյանից, սակայն չհաջողվեց։

«Սասնա Ծռեր» կուսակցության քարտուղարության համակարգող Վարուժան Ավետիսյանն էլ, վերահաստատելով Սեֆիլյանի գրառման մեջ տեղ գտած մտահոգությունը, նշեց, որ Սեֆիլյանը պիտի որոշի՝ բացահայտե՞լ նման տեղեկություններ տարածողների շրջանակը, թե՞ ոչ։

Վարուժան Ավետիսյանը հրաժարվեց նաև հստակեցնել՝ Արցախի հարավային մասից հրաժարվելու ենթադրյալ տեղեկությունները ընդդիմադի՞ր, թե՞ իշխանական շրջանակներից են տարածում:

Ժիրայր Սեֆիլյանի կողմից հրապարակված տեղեկությունն իրականությանը չի համապատասխանում, Factor TV-ի հետ զրույցում ասաց Սյունիքից ընտրված իմքայլական պատգամավոր Տիգրան Կարապետյանը: Պաշտպանության և անվտանգության հարցերի մշտական հանձնաժողովի անդամի խոսքով՝ Սյունիքում խուճապ չկա՝ ո՛չ ռազմական գործողությունների, ո՛չ էլ կեղծ տեղեկությունների տարածման հետևանքով:

Սյունիքում դավաճանական տրամադրություններ սերմանողների մասին Սեֆիլյանի հայտարարությունը հերքում է նաև Սյունիքի մարզից ընտրված մեկ այլ իշխանական պատգամավոր՝ Արմեն Խաչատրյանը: Factor TV-ի հետ զրույցում նա շեշտեց՝ Սյունիքն Արցախի համար առանցքային հենասյուն է և ռազմական թիկունք: Պատգամավորը նշում է՝ հատկապես պատերազմական այս թեժ օրերին ոչ միայն Սյունիքում, այլ ընդհանրապես չպետք է խոսել զիջումների մասին:

Ի վերջո, ովքե՞ր են փորձում «Սյունիքում ձևավորել Արցախի հարավային հատվածի կորստի հետ հաշտվելու մթնոլորտ»: Այս տեղեկության վերաբերյալ Factor TV-ն փորձեց պարզաբանում ստանալ ԱԱԾ-ից՝ արդյո՞ք փորձելու են պարզել, թե ով է նման տեղեկություններ տարածում Սյունիքում: Իրավապահ կառույցից փոխանցեցին, որ նման գրառումներով Ոստիկանությունն է զբաղվում:

Ոստիկանության տեղեկատվության և լրատվության վարչությունից էլ հստակ չնշեցին՝ արդյո՞ք Սեֆիլյանի գրառման տեղեկություններն ուսումնասիրում են: Ասացին միայն՝ Ոստիկանությունը բոլոր գրառումներն է ուսումնասիրում: Եթե դրանց մեջ կան Կառավարության որոշման մեջ նշված կետեր, ապա համապատասխան հետևանքներ են առաջանում:

Նարեկ Կիրակոսյան