Այս վիճակը կարող է ավարտվել 3-րդ համաշխարհայինով, որը Թուրքիան կսանձազերծի և չի կարողանա մարել. ՌԴ պետդումայի պատգամավոր. ՏԵՍԱՆՅՈՒԹ

Factor TV-ն այսօր զրուցել է ՌԴ պետդումայի պատգամավոր Վիտալի Միլոնովի հետ, որը հոկտեմբերի 16-ին Արցախ էր այցելել և անձամբ ականատես եղել Ադրբեջանի կողմից սանձազերծված պատերազմի հետևանքներին։

«Ինձ համար ակնհայտ է, որ Ադրբեջանը դառնում է Թուրքիայի պրոտեկտորատը։ Ադրբեջանի սուվերենությունն ու սեփական կամքն ավելի ու ավելի է քչանում։Ալիևը որոշել է ամրացնել իր դիրքերը թուրք խորհրդականների, Բայրաքթարների հաշվին: Այն ինքնասպան քայլերը, որ իրականացնում է ադրբեջանական կողմը՝ իրենց շահերից չի բխում, այլ՝ Թուրքիայի»,- մեզ հետ զրույցում ասաց ՌԴ պետդումայի պատգամավորը։ Նա շեշտեց՝ ադրբեջանական կողմը ոչ մի անգամ ռեալ քայլեր չի ձեռնարկել, որոնք ցույց կտային իրենց իշխանության խաղաղասեր լինելը. «Ադրբեջանն ուզում է պատերազմել. Ալիևի խոսքերը, թե ինքը դեմ չէ խաղաղությանը՝ սուտ են»։

Միլոնովի վստահեցմամբ՝ ՌԴ-ն պատրաստ է խնդրի կառուցողական քննարկմանը։ Պատգամավորը վստահ է՝ Հայաստանը ևս պատրաստ է կառուցողական քննարկման, մինչդեռ Թուրքիայի ներգրավվածությունը պատերազմում բացասական առումով փոխում է իրավիճակը. «Այն, ինչ հիմա անում է Թուրքիան՝ ցեղասպանություն է, որն ավանդույթ է թուրքական պետության համար։ Ինձ վրդովեցնում է, որ Նիցցա քաղաքում երեք անձի մահը մարդկանց ավելի է զայրացնում, քան երեք հազար մարդու մահն Արցախում»։

Ընդհանուր առմամբ, ըստ Միլոնովի՝ աշխարհում ահաբեկիչների կեսն ունի թուրքական կողմի աջակցությունը և նախօրեին տեղի ունեցած դեպքը՝ Ֆրանսիայում գլուխ կտրողները ոգեշնչվում են Էրդողանից։

«Ահաբեկչական վիճակը տանում է համաշխարհային գլոբալ աղետի։ Այս վիճակը կարող է ավարտվել 3-րդ համաշխարհային պատերազմով, որը Թուրքիան կսանձազերծի և չի կարողանա մարել։ Թուրքիայի խելագար ամբիցիաները՝ կապված աշխարհի կեսը գրավելու հետ, պետք է կանխարգելվեն։ Էրդողանի հիվանդագին, գիշերային երազները՝ կապված Օսմանյան կայսրության հետ, վատ են անդրադառնում աշխարհի կայունության վրա։ Ամբողջ քաղաքակիրթ մարդկությունը Թուրքիան պետք է վտարանդի երկիր դարձնի»,- շեշտեց պատգամավորը։

Հարցազրույցն ամբողջությամբ՝ տեսանյութում:

Մերի Մարտիրոսյան