Պատերազմ մեդիա դաշտում․ադրբեջանաթուրքական գրոհներին հայերը ստրատեգիական հակահարվածներ են տալիս. ՏԵՍԱՆՅՈՒԹ

Առաջնագծում կռվողների  թիկունքն արդեն 33 օր փորձում են ամուր պահել նաև տեղեկատվական ճակատի մարտիկները, որոնք  ձևավորել են  մեդիագրոհայինների բանակներ։

Մարքեթինգի մասնագետ Ռոման Դանեղյանն այդպիսի  բանակներից մեկի նախաձեռնողն է։ Պատերազմի երկրորդ օրը բացված խումբը երկու օրում ուներ 60․000-ից ավելի անդամ։ Այսօր արդեն շուրջ 150․000։ Բոլորը չէ, որ ակտիվ են, բայց ինչքան շատ են անդամները, այնքան բարձր կլինի ակտիվությունը։

Ինֆորմացիոն անսպառ հոսքերի մեջ ճիշտ նշանակետեր ընտրել և թիրախավորել. սա մեդիագրոհայինների հիմնական նպատակն է:

Գրոհի դաշտերը տարբեր են՝ ֆեյսբուք, թվիթեր, յութուբ։ Տարբեր են նաև ռազմավարական գործիքները։ Այս դաշտերում տանկերին ու սմերչերին փոխարինում են մեկնաբանությունները, ալգորիթմներն ու հեշթեգերը։

Ինչպես առաջնագծում, այնպես էլ համացանցում ադրբեջանցիներին օգնում են թուրքերը, այստեղ ևս քիչ չեն վարձկանները։

Ստրատեգիկ քայլերից մեկն էլ պատերազմում «քոմենթային պայքարի» մեջ չմտնելն է, ինչը, որպես կանոն, հրահրում է թշնամական բանակը:

Իսկ թե երբ և որ լրատվականին է պետք գրոհել՝ հաճախ անկանխատեսելի է. և՛ հոդվածների բովանդակությունը, և՛ ուղղվածությունը անընդհատ փոփոխվում են։

Այդ փոփոխությունները մեդիագրոհայինների աչքի տակ են օրը 24 ժամ․ որպեսզի բաց չթողնեն թիրախներ, պետք է անընդհատ լինել օնլայն ու հասանելի։ Օրինակ՝ Ռոմանը իր աշխատանքի հետ զուգահեռ ու նաև աշխատանքից հետո՝ օրական նվազագույնը 7-8 ժամ այս պատերազմում է, ակտիվ գրոհայինների թիվը օր օրի է ավելանում։ Ռոմանն ասում է՝ օնլայն պատերազմի թիրախային ժամը երեկոյան 8-ից հետո է մինչև կեսգիշեր, բայց հարձակումները թուլացնել չի կարելի օրվա և ոչ մի ժամին։

Իրինա Մկրտչյան