Նախագահի ավտոմեքենան՝ գնորդի սպասելիս

Սեպտեմբերի 7-ին պետգույքի կառավարման վարչությանը կրկին թույլատրվեց աճուրդի հանել ՀՀ նախկին նախագահ Լևոն Տեր-Պետրոսյանին սպասարկած «Մերսեդես Բենց 500 ՍԵԼ» մակնիշի մեքենան:

1982 թվականի զրահապատ ավտոմեքենայի մեկնարկային գին սահմանվեց 17 մլն դրամը: Օրերս մամուլը գրեց, որ դեկտեմբերի 12-ի աճուրդը չի կայացել գնորդ չլինելու պատճառով: Հաջորդ աճուրդը նշանակված է դեկտեմբերի 27-ին: Առաջին նախագահին սպասարկած մեքենան արդեն աճուրդի կդրվի 20 տոկոսով ավելի էժան:

Անկախ Հայաստանի առաջին նախագահին սպասարկած մեքենայի նկատմամբ մեծահարուստների այսպիսի անտարբերությունը բավականին զարմանալի է, թեև՝ նաև հատկանշական: Աշխարհում, սովորաբար, երկրի համար պատմական նշանակություն ունեցող իրադարձություններին կամ դեմքերին առնչվող իրերը բավականին թանկ են վաճառվում: Օրինակ՝ 2017թ. օգոստոսին Սանկտ Պետերբուրգում 19,7 մլն ռուբլով վաճառվեց ՌԴ նախկին նախագահ Բորիս Ելցինին սպասարկած զրահապատ Mercedes-Benz S-klasse Trasco Bremen լիմուզինը: Ferrari F430 ավտոմեքենան, որը նախկինում պատկանել է ԱՄՆ նախագահ Դոնալդ Թրամփին, այս տարվա ապրիլին Ֆլորիդայում, Auctions America-ի կազմակերպած աճուրդում վաճառվեց 270 հազար դոլարով: Իրանի նախկին նախագահ Մահմուդ Ահմադինեժադի մեքենան 2011թ. մարտին աճուրդում վաճառվեց 2,5 միլիոն դոլարով և այլն:

Որևէ հայտնի դեմքի օգտագործած իրի վաճառքի արժեքը բացահայտում է այդ գործչի հեղինակությունը: Մեզանում ծառայողական ավտոմեքենաների օպտիմալացման որոշումն ազդեց առաջին հերթին նախկին նախագահի թանկարժեք գույքի վրա: Ի դեպ, դեռ մեկ տարի առաջ՝ դեկտեմբերին, երբ ավտոմեքենան առաջին անգամ էր հանվել աճուրդի, ՀՀ մշակույթի նախարար Արմեն Ամիրյանը կես կատակ ասել էր «Ժողովուրդ» թերթին՝ «Գուցե ես էլ մտածեմ գնելու մասին»:

Փաստորեն, չի մտածել: Գուցե սպասում է գնանկմա՞նը:

Սևակ Հակոբյան