«Ազատամարտիկներն օգտագործվում են». Ինչու Վովա Վարդանովը չի միանում Վոլոդյա Ավետիսյանի պայքարին ու չի պաշտպանում Ժիրայր Սեֆիլյանին

Ազատամարտիկ, առաջին հետախուզադիվերսիոն ջոկատի հրամանատար Վովա Վարդանովը factor.am-ի հետ զրույցում ասում է, որ ազատամարտիկներն այսօր պասիվ են քաղաքական պայքարում և չեն միանում, օրինակ, բանտից նոր դուրս եկած ու կառավարության դիմաց նստացույց անող ազատամարտիկ Վոլոդյա Ավետիսյանին, քանի որ նրանց «բազմիցս օգտագործել են»:

«90-ականներից ազատամարտիկները օգտագործվեցին, ես եմ օգտագործվել նաև տարբեր ընտրություններում: Անընդհատ ազատամարտիկներին օգտագործել են, չարաշահել են ազատամարտիկի տիտղոսը»,- ասում է նախկին ազատամարտիկը:

Ըստ նրա՝ ազատամարտիկների ներգրավվումը քաղաքական պայքարներում ցանկալի արդյունք չի տվել: «Չեմ կարծում, որ էն խնդիրները, որ լուծվել են, ազատամարտիկների համար շատ կարևոր էին: Կարևոր էր մարդու համար, որը ազատամարտիկ էր»,- նշում է նա՝ հավելելով, որ ողջունում է Վոլոդյա Ավետիսյանի պայքարը, սակայն կցանկանար, որ այն լիներ ոչ թե քաղաքական, այլ զուտ ազատամարտիկների և զինվորականների սոցիալական խնդիրների համար, ինչպես նախկինում:

Ինչ վերաբերում է փաստին, որ ազատամարտիկները պասիվ են ու գրեթե չեն մասնակցում Շուշիի ջոկատի հրամանատար Ժիրայր Սեֆիլյանի դատին, ապա Վովա Վարդանովն ասում է, որ ինքը պարտավոր չէ պաշտպանել Սեֆիլյանին:

«Քաղաքական պայքարն էն բանն է, որ ամեն մարդ ինքն է մտածում որ կողմում գտնվի ու ընդհանրապես կողմ բռնի՞, թե՞ չէ: Ժիրայրի հետ շատ լավ հարաբերությունների մեջ եմ, Ժիրոն վաստակաշատ ազատամարտիկ ա, բայց ո՞վ ա ասում, որ ես իրա հետ պարտադիր պիտի համաձայնվեմ: Ժիրայր Սեֆիլյանի տակտիկան ինձ դուր չի գալիս, ես ինչի՞ պետք է իրեն պաշտպանեմ, չեմ էլ ուզում իր կողքը գտնվել»,- ասում է Վարդանովը:

Միևնույն ժամանակ Վովա Վարդանովը հայտարարում է, որ հենց իրենք թույլ չեն տալու, որ Արցախի ազատագրված տարածքները վերադարձվեն փոխզիջումի տեսքով. «Չեմ կարծում, որ ազատամարտիկների ձայնը կանտեսեն: Հըլը թող մեկը փորձի հող վերադարձնի»:

Մանրամասները դիտեք factor.am-ի հետ ազատամարտիկ Վովա Վարդանովի հարցազրուցում:

Մարինե Խառատյան