03.11.2026 | 23:29
Թրամփը հայտարարել է, որ ԱՄՆ-ը կդադարեցնի Իսրայելին տարեկան 4 միլիարդ դոլարի օգնության տրամադրումը
17 մլն 900 հազար եվրո արժողությամբ նոր վարկային համաձայնագիրը ԱԺ հանձնաժողովում դրական եզրակացություն ստացավ
Քաղաքականություն
23.10.2020 | 15:42
ԱԺ ֆինանսավարկային և բյուջետային հարցերի մշտական հանձնաժողովն այսօրվա նիստում դրական եզրակացություն տվեց այս տարվա ապրիլի 21-ին Հայաստանի Հանրապետության ու Վերակառուցման և զարգացման միջազգային բանկի միջև ստորագրված «Սոցիալական ներդրումների և տեղական զարգացման ծրագրի համար լրացուցիչ ֆինանսավորում» վարկային համաձայնագրին:
Համաձայնագրով նախատեսվում է Հայաստանի Հանրապետությանը տրամադրել 17 մլն 900 հազար եվրո լրացուցիչ ֆինանսավորում: Նպատակը համայնքային և միջհամայնքային ենթակառուցվածքների որակի, օգտագործման և հասանելիության բարելավումն է:
Նախագիծը հանձնաժողովի նիստում ներկայացրեց տարածքային կառավարման և ենթակառուցվածքների նախարարի տեղակալ Վաչե Տերտերյանը։ Նրա խոսքով՝ սա բոլորովին նոր համաձայնագիր է և կարելի է գնահատել որպես նոր վարկ, չնայած նրան, որ այն իր բովանդակությամբ և կառուցվածքով շարունակությունն է արդեն գործող վերցված վարկերի։
«Ծավալը կկազմի 25,4 մլն, որից վարկային ռեսուրսը կլինի 17,9 մլն, Կառավարության համաֆինանսավորումը՝ 6,3 մլն և համայնքային ներդրումները՝ 1,1 մլն դոլարին համարժեք դրամ։ Այս ծրագիրը կունենա 3 բաղադրիչներ՝ օժանդակություն սոցիալ-տնտեսական զարգացման և կարողությունների զարգացմանը՝ տեղական մակարդակով, օժանդակություն միջհամայնքային զարգացումներին և նաև ինստիտուցիոնալ բարելավումներ համայնքներում, և տարածքային զարգացման հիմնադրամի ինստիտուցիոնալ ուժեղացում»,- մանրամասնեց փոխնախարարը։
Համաձայնագիրն արժանացավ հանձնաժողովի անդամների դրական եզրակացությանը և ընդգրկվեց ԱԺ լիագումար նիստերի օրակարգ:
Անժելա Պողոսյան
