01.07.2026 | 02:54
ԱԱ-2026. Ֆրանսիան խնդիրներ չունեցավ, Մբապեի դուբլը. ՏԵՍԱՆՅՈՒԹ
Արդյոք Փաշինյան-Ալիև հանդիպմամբ հրադադար կհաստատվի՞. ՏԵՍԱՆՅՈՒԹ
Քաղաքականություն
20.10.2020 | 20:00
Հայաստանի և Ադրբեջանի ղեկավարները հայտարարել են, թե համաձայն են մեկնել Մոսկվա՝ դեմ առ դեմ հանդիպման։ Նիկոլ Փաշինյանն ու Իլհամ Ալիևն այս մասին ասել են ռուսական ՏԱՍՍ-ին՝ առանձին տված հարցազրույցների ժամանակ։
Փաշինյան-Ալիև հանդիպմանն այսօր անդրադարձել է Հայաստանի արտաքին գործերի փոխնախարար Շավարշ Քոչարյանը: Առայժմ հայտնի չէ՝ երբ է կայանալու հանդիպումը։ Երկու երկրների ղեկավարները ՏԱՍՍ-ի հետ հարցազրույցում նշել են, որ Մոսկվայից նման հրավեր դեռ չեն ստացել:
Սակայն, ուշագրավ է, որ Հայաստանի վարչապետ Նիկոլ Փաշինյանը Ալիևի հետ հավանական հանդիպումից առաջ քաղաքական ուժերի հետ ընդլայնված հանդիպումներ է ունենում: Երեկ նա արդեն երկրորդ անգամ հանդիպել է արտախորհրդարանական ուժերի ներկայացուցիչների հետ։ Նույն օրը եղել է նաև անվտանգության խորհրդի նիստ՝ ԱԺ խմբակցությունների մասնակցությամբ: Այսօր էլ Փաշինյանը հանդիպել է իշխող «Իմ քայլը» խմբակցության վարչության կազմի և Արցախի նախկին նախագահներ Բակո Սահակյանի ու Արկադի Ղուկասյանի հետ:
Քաղաքագետ Արմեն Բադալյանի կարծիքով՝ Փաշինյան-Ալիև մոսկովյան հանդիպումը հավանական կդառնա այն ժամանակ, երբ թշնամու զինուժը պարտություն կրի Արցախի Հանրապետության հարավային հատվածում: Այսօր Պաշտպանության նախարարության խոսնակ Շուշան Ստեփանյանը տեղեկացրել է, որ հակառակորդը հարավային ուղղությամբ՝ Խուդաֆերինի ջրամբարի մոտ, նահանջում է՝ մեծ կորուստներ կրելով:
«Բաքվին բանակցությունների սեղանի շուրջ նստեցնելուն նպաստում է ոչ միայն սեփական զինուժի մեծաթիվ կորուստները, այլև Ռուսաստանի հետ խնդիրներից խուսափելու ցանկությունը»,- կարծում է քաղաքագետ Արմեն Բադալյանը։
Վերլուծաբանները չեն շտապում տեսակետներ հայտնել, թե Փաշինյան-Ալիև հանդիպումն ինչ արդյունքներ կտա:
Արմեն Բադալյանը, մատնանշելով արտգործնախարարների մակարդակով տեղի ունեցած երկու հանդիպումները և դրանց հետևանքները, նշում է․ «Թուրքիան ազդեցության մեծ լծակներ ունի Ադրբեջանի վրա, ուստի հարց է առաջանում, թե Ալիևը Մոսկվայում որքան ինքնուրույնություն կցուցաբերի»:
Քաղաքագետ Ստեփան Գրիգորյանը ողջունելի է համարում Նիկոլ Փաշինյանի՝ Մոսկվայում ղարաբաղյան խնդրի շուրջ բնակցությունների մասնակցելու պատրաստակամությունը: Սակայն քաղաքագետը մտավախություն ունի, որ պատերազմը չի դադարի: Ստեփան Գրիգորյանի խոսքով՝ եթե Մոսկվայում Փաշինյան-Ալիև հանդիպումը դրական արդյունք չունենա, ապա ռազմական գործողությունները կշարունակվեն այնքան, մինչև կողմերից մեկն էական առավելության կհասնի:
Հավելենք, որ հոկտեմբերի 23-ին էլ սպասվում է Հայաստանի և Ադրբեջանի արտգործնախարարների հանդիպումը Վաշինգտոնում՝ ԱՄՆ պետքարտուղար Մայք Պոմպեոյի հետ։
Մանրամասները՝ տեսանյութում։
Նարեկ Կիրակոսյան
