15.12.2025 | 21:13
Ալիևը համաներում է նախաձեռնում. այն կվերաբերի ավելի քան 20,000 մարդու
Դաժան պատերազմ շփման գծում. մահ և լքված դիակներ Լեռնային Ղարաբաղում․ NYT
Քաղաքականություն
19.10.2020 | 21:13
Լեռնային Ղարաբաղում շփման գծում գարշահոտությունն անտանելի է։ Զինյալների դիերն այստեղ ընկած են արդեն մի քանի շաբաթ։ Այս մասին գրել է New York Times-ի թղթակից Անտոն Տրոյանովսկին։
«Կովկասի լեռներում, որտեղ Եվրոպան հանդիպում է Ասիային, Հայաստանի ու Ադրբեջանի միջև վիճելի տարածքի շուրջ արդեն 3 շաբաթ տևող հակամարտությունը վերածվել է դաժան պատերազմի»,- գրել է հեղինակը։
Ըստ հոդվածագրի՝ Ադրբեջանը զինվորների շարասյուներ է զոհում՝ փոքրիկ տարածքներ գրավելու համար։ Այն խաղաղ բնակիչները, որոնք մնացել են այստեղ, ապրում են խոնավ ու չջեռուցվող ապաստարաններում, իսկ ոմանք քնում են փռված ստվարաթղթե տուփերի վրա։
Լեռնային Ղարաբաղի ու Ադրբեջանի քաղաքների հրթիռակոծությունների արդյունքում զոհվել են տասնյակ քաղաքացիական բնակիչներ և հարյուրավոր զինվորներ, իսկ գիշերները լցվել են սարսափեցնող պայթյուններով ու դղրդյուններով։
Լրագրողը պատմել է, որ Լեռնային Ղարաբաղի մայրաքաղաք Ստեփանակերտում, որտեղ ինքը եղել է շուրջ 4 օր, հեռվից հաճախ լսվում է հրետանային կրակ:
«Ուրբաթ ուշ երեկոյան քաղաքը ենթարկվեց հարձակման: Ամբողջ գիշեր օդային հարձակման մասին ազդանշաններ էին հնչում, հարվածներ էին հասցվում, հյուրանոցի հյուրերը նետվում էին նկուղ: Արկերից մեկն ընկավ քաղաքի կենտրոնում՝ դեղին լույսով լուսավորելով հյուրանոցի իմ պատուհանը: Լեռնային Ղhարաբաղի ճարտարապետ Մանուշակ Տիտանյանն այս պատերազմական գործողությունների արդյունքում արդեն կորցրել է իր գործերից մեկը՝ Շուշիի բլրի գագաթին գտնվող մշակույթի տունը, տանիքն այլևս չկա, դրա մի կտորը խրված է դիմացի ծառի մեջ»,- պատմում է լրագրողը:
Հոդվածում նշվում է, որ Կասպից ծովում նավթագային հանգույց հանդիսացող Ադրբեջանը գործի է դրել գերժամանակակից ԱԹՍ-ներ ու հրետանային համակարգեր, որոնք գնում է Իսրայելից, Թուրքիայից և Ռուսաստանից: Բայց հակամարտությունից երեք շաբաթ անց Ադրբեջանը չի կարողացել իր այդ ռազմական առավելությունը վերափոխել տարածքայինի, իսկ սա նշանակում է, որ սպասվում է երկար պատերազմ: Այն կարող է վերաճել ավելի լայն ճգնաժամի՝ Ադրբեջանի հիմնական գործընկերոջ՝ ՆԱՏՕ-ի դաշնակից Թուրքիայի, ինչպես նաև Ռուսաստանի ներգրավմամբ, որն էլ իր հերթին Հայաստանի հետ ունի փոխադարձ պաշտպանական դաշինք:
«Շաբաթ Հայաստանն ու Ադրբեջանը հայտարարեցին հրադադարի մասին, որպեսզի լուծեն դիակները հավաքելու և գերիներին փոխանակելու հարցը: Բայց, ինչպես մեկ շաբաթ առաջ Ռուսաստանի միջնորդությամբ հրադադարի դեպքում, մարտերը շարունակվեցին»,- հավելել NYT-ի թղթակիցը:
Տաթև Ֆռանգյան
