12.10.2026 | 15:36
Ադրբեջանի դպրոցներում զանգվածային բողոքի ցույցեր են անցկացվել․ հաղորդվում է սոցցանցերի խափանումների մասին․ ՏԵՍԱՆՅՈՒԹ
Ֆրանսիայում ուսուցչի սպանությունից հետո 80 հետաքննություն է սկսվել․ Մակրոնը սպանությունն իսլամիստական ահաբեկչություն է որակել
Քաղաքականություն
19.10.2020 | 17:33
Ֆրանսիայի ոստիկանությունը շրջայցեր և խուզարկություններ է իրականացրել մի քանի տասնյակ ծայրահեղական իսլամիստների տներում՝ Փարիզում ուսուցչի սպանությունից երեք օր անց։ Ուսուցիչը սպանվել էր Մուհամմեդ մարգարեի ծաղրանկարը դասի ժամանակ ցուցադրելու համար։
Ավելի քան 80 հետաքննություն է սկսվել՝ հարձակումից հետո համացանցում ատելություն տարածելու հիմքով։ Այս մասին հայտնել է Ֆրանսիայի ՆԳ նախարար Ժերալդ Դարմանենը, գրում է DW-ի ռուսական ծառայությունը։
Խոսքն այն անձանց մասին է, ովքեր ավելի վաղ արդեն հայտնվել են իրավապահների տեսադաշտում կամ աչքի են ընկել համացանցում՝ քարոզներ անելով ու հաղորդագրություններ տարածելով։
Ֆրանսիայի ՆԳՆ ղեկավարը հավելել է, որ, ընդհանուր առմամբ, քննչական մարմինների ուշադրության կենտրոնում է «22․000 մարդ, որոնք, ամենայն հավանականությամբ, արմատական իսլամի հետ կապ ունեն»։
«Նրանցից ոչ բոլորն են գտնվում Ֆրանսիայում, ընդ որում՝ նրանց շարքում ակտիվ են 8․000-ը»,- նշել է Դարմանենը։
Հոկտեմբերի 16-ին մետրոյում «Ալլահին աքբար» ճիչով դանակով զինված մի երիտասարդ հարձակվել է ուսուցչի վրա ու կտրել նրա գլուխը։ Հարձակվողը գնդակահարվել է ոստիկանության կողմից։
Հետաքննության տվյալների համաձայն՝ նա Մոսկվայում ծնված 18-ամյա չեչեն Աբդուլլահ Ա․-ն է, որը, Ֆրանսիայում ՌԴ դեսպանության տվյալներով, ընտանիքի հետ միասին 2008 թվականին հեռացել է Ռուսաստանից և Ֆրանսիայում քաղաքական ապաստան ստացել։
Ֆրանսիայի նախագահ Էմանուել Մակրոնն այս սպանությունն իսլամիստական ահաբեկչություն է կոչել։
Տաթև Ֆռանգյան
