12.10.2026 | 14:44
Տնտեսագիտության ոլորտում Նոբելյան մրցանակի են արժանացել ամերիկացի երկու գիտնականներ
Երևանն ու Բաքուն պարտավորվել են խաղաղ ճանապարհով լուծել ԼՂ հակամարտությունը․ ԵԽ քարտուղար
Քաղաքականություն
19.10.2020 | 16:44
Ադրբեջանն ու Հայաստանը Եվրոպախորհրդի առաջ իրենց տարածքներում մարդու իրավունքների պաշտպանության, ինչպես նաև Լեռնային Ղարաբաղի հակամարտության խաղաղ կարգավորման վերաբերյալ պարտավորություններ ունեն։ Այս մասին այսօր հայտարարել է Եվրախորհրդի գլխավոր քարտուղար Մարիա Պեյչինովիչ Բուրիչը՝ ելույթ ունենալով Միջազգային հարաբերությունների Մոսկվայի պետական ինստիտուտում, հաղորդում է ՏԱՍՍ-ը։
«Հայաստանն ու Ադրբեջանը Եվրոպայի խորհրդի անդամներ են։ Երկու կողմերն էլ պարտավորվել են մեր կազմակերպության առջև հակամարտությունը խաղաղ ճանապարհով կարգավորել։ Եվ երկու կողմերն էլ պարտավոր են հետևել Մարդու իրավունքների մասին Եվրոպական կոնվենցիային։ Մարդու իրավունքների պաշտպանությունն այդ տարածքում կենսական կարևորություն ունի և հանդիսանում է իրավական պարտավորություն»,- ասել է նա։
Բուրիչի խոսքով՝ այս հակամարտության համատեքստում բարձրացվում է վիճելի տարածքներում մարդու իրավունքների ապահովման ավելի լայն խնդիրը։
«Անկախ քաղաքականությունից՝ մարդիկ, ովքեր այնտեղ ապրում են, պետք է ակնկալեն մարդու իրավունքների, ժողովրդավարության ու օրենքի նույն գերակայությունը, ինչ Եվրոպայի ցանկացած այլ բնակիչ։ Ազգային իշխանությունները պարտավոր են ապահովել սա։ Եվրոպայի խորհուրդը պետք է առանց խոչընդոտների հասանելիություն ունենա դեպի այդ տարածքներ, որպեսզի մենք կարողանանք գնահատել իրավիճակն ու համարժեք օգնություն ցուցաբերել»,- ասել է եվրոպացի պաշտոնյան։
Նա նշել է, որ հակամարտությունների և տարածքային վեճերի կարգավորումը չի մտնում կազմակերպության լիազորությունների մեջ, միաժամանակ, ընդգծել, որ մարդու իրավունքների պահպանման խնդրի կարգավորումը դարձել է այդ պաշտոնում իր մանդատի առաջնահերթություններից մեկը:
Տաթև Ֆռանգյան
