30.06.2026 | 23:28
«Ուիմբլդոն»․ Կարեն Խաչանովը մեկնարկել է հաղթանակով
Կորոնավիրուս․ Եվրոպայում պարետային ժամ է սահմանվել
Քաղաքականություն
19.10.2020 | 12:49
Եվրոպայում նոր սահմանափակումներ են մտցվում այն բանից հետո, ինչ COVID-19-ի հետևանքով զոհերի թիվը գերազանցել է 250 հազարը։ Բելգիայում հոկտեմբերի 19-ին սահմանել են համընդհանուր պարետային ժամ, Շվեյցարիայում պարտադիր են դարձրել փակ տարածքներում դիմակների կրումը, գրում է DW-ի ռուսական ծառայությունը։
Բելգիայի վարչապետ Ալեքսանդր Դե Կրոոն ավելի վաղ մանրամասնել է, որ պարետային ժամը գործում է 00:00-ից մինչև 05:00-ն։ Բացի այդ՝ փակ են բոլոր բարերն ու ռեստորանները, այս հաստատություններին թույլատրվում է միայն առաքումով վաճառք իրականացնել։
Շվեյցարիայում արգելել են 15 հոգուց ավելի խմբերով հավաքները։
«Վարակակիրների թվի կտրուկ աճն անհանգստություն է հարուցում։ Սա իրականում վերաբերում է բոլոր տարիքային խմբերին»,- ասվում է կառավարության հայտարարության մեջ։
Ֆրանսիայի նախագահ Էմանուել Մակրոնը ևս հայտարարել է երկրի մի շարք քաղաքներում պարետային ժամ սահմանելու մասին, այդ թվում՝ մայրաքաղաք Փարիզում։ Արգելվում է փողոց դուրս գալ ժամը 21։00-ից մինչև 06:00-ն։ Սահմանափակման միջոցներն ուժի մեջ են մտել հոկտեմբերի 17-ից ու կշարունակվեն 4 շաբաթ։
Այս պահին աշխարհում կորոնավիրուսով վարակվածների ընդհանուր թվի 17 տոկոսը բաժին է ընկնում Եվրոպային, իսկ մահացություններինը՝ 22 տոկոսը։
Worldometer-ի տվյալների համաձայն՝ վարակակիների ընդհանուր թիվը կազմում է 7․012․156 մարդ։
Տաթև Ֆռանգյան
