17.09.2026 | 23:38
Սամվել Կարապետյանի տնային կալանքը երկարաձգվել է
«Ուզում եմ քնել, Դուք ինձ խանգարում եք». ԵՊՀ ռեկտորի պաշտոնակատարը՝ իր՝ «եթե քննությունը հունվարին լինի, կորուստդ կվերադառնա՞» արտահայտության մասին հարցին ի պատասխան
Հասարակություն
18.10.2020 | 12:37
ԵՊՀ ուսանողուհի Կարինե Գաբրիելյանը ֆեյսբուքում գրառում է կատարել՝ մանրամասներ ներկայացնելով երեկ ԵՊՀ ռեկտորի պաշտոնակատար Գեղամ Գևորգյանի հետ առցանց հանդիպումից։
Կարինե Գաբրիելյանը գրել է. «Խաղաղ պայմանները համեմատելով պատերազմական իրավիճակի ու երկրում հաստատված ռազմական դրության հետ, ռեկտորն ասում է. «եթե սովորական ժամանակ մարդ մահանար, դուք գալու ասելու էիք քննություն չտա՞նք կամ հետաձգե՞նք, եթե քննությունը հունվարին լինի, կորուստդ կվերադառնա՞»…
Ուսանողներից մեկը նշեց, որ իր խնայողությունները փոխանցել է Հայաստան Համահայկական Հիմնադրամին, այդ պատճառով չի կարողացել մուծել վարձը, և ռեկտորը պատասխանում է. «մեր հաշվին Արցախին լավություն եք անում, ես հաստատ մեկի (ԵՊՀ֊ի) հաշվին՝ մյուսին (Արցախին,զինվորին) լավություն չէի անի»…
Նորից կարդացեք վերջին տողերը, Մայր բուհի առաջին դեմքի՝ ռեկտորի ժամանակավոր պաշտոնակատար Գեղամ Գևորգյանի խոսքերը»։
Այս տեղեկությունների վերաբերյալ Factor.am-ը փորձեց մեկնաբանություն ստանալ ռեկտորի պաշտոնակատարից։ Գեղամ Գևորգյանը, լսելով մեր հարցն, ասաց.
«Հանդիպում եղել է, քննարկում եղել է, իմ մտքից հատված է վերցված»։
Երբ առաջարկեցինք ամբողջական միտքը փոխանցել, Գեղամ Գևորգյանն ասաց. «Ես գիշերային հերթապահությունից եմ եկել, ուզում եմ քնել, Դուք ինձ խանգարում եք»։
Նարեկ Կիրակոսյան
