12.01.2025 | 22:00
Ընտրությունները կեղծվեցին, բայց մենք էլ չպատրաստվեցինք այնպես, ինչպես անհրաժեշտ էր․ Զուրաբիշվիլի
Դոնբասում թուրքական անօդաչուների ու ռուսական ՀՕՊ համակարգերի պատերազմ է սպասվում․ ПолитНавигатор
Քաղաքականություն
16.10.2020 | 13:45
Ուկրաինան կարող է համաձայնության գալ Թուրքիայի հետ՝ բարձր ճշգրտության սպառազինություն ու անօդաչուներ մատակարարելու հարցում։ Այս հարցը կքննարկվի Ուկրաինայի նախագահ Վլադիմիր Զելենսկու՝ Անկարա կատարելիք այցի ժամանակ, հայտարարել է Գերագույն ռադայի նախկին պատգամավոր, միջազգային հարաբերությունների հարցերով փորձագետ Եվգենի Դոբրյակը, գրում է «ПолитНавигатор»-ը։
Դոբրյակի խոսքով՝ արդեն այսօր Ուկրաինայի ու Թուրքիայի միջև պետք է կնքվի ռազմական ոլորտում համագործակցության վերաբերյալ պայմանագիր։
«Ուկրաինայում այսօր չկան բարձր ճշգրտության, բարձր տեխնոլոգիական զենքի նմուշներ, որոնք պետք է ծառայեին մեր պետությանը՝ մեր զինված ուժերի մարտունակությունը բարձրացնելու համար: Նախ և առաջ՝ ինչի՞ մասին կխոսեն։ Մենք ծանոթ չենք 21 կետերին, որոնք ներառված են համաձայնագրում, սակայն գիտենք, որ Ուկրաինան ծայրաստիճան հետաքրքրված է ТВ-2 հարվածային ԱԹՍ-ների ձեռքբերումով։ Սա գործառնական-մարտավարական անօդաչու թռչող սարք է, որը թռչում է միջին բարձրության վրա, ունի թռիչքի շատ երկար տևողություն ու գերճշգրիտ հարվածներ է հասցնում թիրախներին»,- հայտարարել է Դոբրյակը՝ նշելով, որ, իր տեղեկությունների համաձայն, կա պայմանավորվածություն, որ այդ անօդաչուները նաև կարտադրվեն Ուկրաինայի տարածքում։
Փորձագետը նաև նշել է, որ Ուկրաինա թուրքական սպառազինության մատակարարումից հետո Դոնբասում դրա կիրառման դեպքում Ռուսաստանը կարող է Լուգանսկի ու Դոնբասի հանրապետություններին մատակարարել անօդաչուների դեմ պայքարի ժամանակակից միջոցներ։
«Ի՞նչ սրացումներ կարող են լինել Ռուսաստանի Դաշնության հետ, քանի որ Ուկրաինայի արևելքում ռազմական գործողությունների պայմաններում նմանատիպ զենքի կիրառումն իսկապես հնարավորություն չի տալիս Լուգանսկին ու Դոնբասին նույնկերպ պատասխանել, քանի որ այդ հանրապետությունների ունեցած զենիթահրթիռային համակարգերը՝ «Стрела-10»-ը, չեն կարողանում հասնել այդ ԱԹՍ-ին։ Այսինքն՝ օպերատիվ-մարտավարական հավասարակշռությունը փոխվում է: Սա իրապես կարող է հրահրել Ռուսաստանին ավելի ժամանակակից զենքի տեսակներ տրամադրել Ուկրաինայի արևելքին և սրել ներկայիս իրավիճակը»,- ասել է փորձագետը:
Տաթև Ֆռանգյան
