06.10.2026 | 10:32
ՀՀ տարածքում ավտոճանապարհներն անցանելի են
Քաղաքացիական 33 զոհ, թիրախավորված եկեղեցի, դպրոց, հիվանդանոց. ռազմական հանցագործություններն ու միջազգային կառույցների անհամարժեք արձագանքը․ ՏԵՍԱՆՅՈՒԹ
Քաղաքականություն
15.10.2020 | 22:35
Ադրբեջանական պատերազմական հանցագործությունների հետևանքով մինչև հոկտեմբերի 5-ը, Արցախում զոհվել է 19, վիրավորվել՝ 80 քաղաքացիական անձ, վնասվել է մոտ 2․700 գույք ու ենթակառուցվածք։
Մինչև հոկտեմբերի 9-ը զոհվել է 20, վիրավորվել՝ 101 խաղաղ բնակիչ, որոնցից 38-ը վիրավորումը ստացել է անմիջապես իր բնակության վայրում՝ արկի պայթյունի հետևանքով։ Վնասվել է 960 ենթակառուցվածքային, հանրային և արտադրական նշանակության օբյեկտ, ավելի քան 5․800 մասնավոր սեփականության անշարժ գույք՝ բնակելի տներ, խանութներ և այլն։
Հոկտեմբերի 15-ի դրությամբ՝ զոհված քաղաքացիների թիվը հասել է 32-ի, վիրավորները՝ 106-ի։
«Պոլոնեզ», «Սմերչ» համակարգեր, LAR-160 տեսակի համազարկային կայանքների կասետային արկեր և ոչ միայն։ Հենց սրանցով է թշնամին թիրախավորում խաղաղ բնակչությանն ու բնակավայրերը։ Թիրախավորված բնակավայրերի թիվը 120-ից ավելի է։
Այս պահին, նախնական տվյալներով, վիրավոր երեխաները 4-ն են։ Նրանցից մեկը 13-ամյա Ռոբերտն է։ Նա 5 օր կոմայի մեջ էր, վերջերս է դուրս եկել, բայց շարունակում է մնալ վերակենդանացման բաժանմունքում: Ռոբերտն ու նրա ընտանիքը սեպտեմբերի 27-ին ստիպված են եղել փախչել Մարտակերտից, որը Ադրբեջանը հրետակոծում էր, սակայն ճանապարհին մեքենային ԱԹՍ է հարվածել: Ընտանիքի բոլոր անդամները ծանր վնասվածքներ են ստացել, ամենից շատ տուժել է Ռոբերտը: Վիրավոր է նաև եղբայրը՝ 15-ամյա Նարեկը։
2-ամյա Արծվիկն էլ Մարտունի քաղաքում ծանր ռմբակոծությունից հետո է վիրավորվել, Երևանի «Սուրբ Աստվածամայր» ԲԿ-ում վիրահատվել է: Գլխի շրջանում կատարված բարդ վիրահատությունն անցել է լավ, երեխայի կյանքին վտանգ չի սպառնում: Վնասվածքներ ունի նաև վերջույթների շրջանում։ Ռմբակոծության հետևանքով Արծվիկի 9-ամյա քույրն ու տատիկը մահացել են։
Կիրառված զենքերի և վնասված ենթակառուցվածքների մասին մանրամասները Factor TV-ին ներկայացրեց Արցախի մարդու իրավունքների պաշտպան Արտակ Բեգլարյանը։ Ասաց՝ ռազմական հացագործություններին միջազգային կազմակերպությունների կողմից տրված պատասխանը, մեղմ ասած, բավարար չէ։
Ի դեպ՝ օրեր առաջ Ադրբեջանը խախտեց ինչպես հրադադարի պայմանները, այնպես էլ Ժնևյան կոնվենցիայի պահանջները։
Հումանիտար հրադադարի պայմաններում դիվերսիոն խումբը ներթափանցել էր Հադրութ քաղաք և սպանել 5 քաղաքացիական անձի։ Արցախի Հանրապետության Քննչական կոմիտեն տեղեկացնում է, որ դեպքի առթիվ հարուցված քրեական գործն ընդունվել է կոմիտեի վարույթ։
Մանրամասները՝ տեսանյութում։
Իրինա Մկրտչյան
