25.02.2026 | 12:00
Թոշակները կբարձրանան մինչև 10 հազար դրամով // մանկապարտեզի տնօրենի նկատմամբ գրավ է կիրառվել․ ԼՈՒՐԵՐ
Հիմա այդ գործողություններն ինձ համար անհասկանալի են. Արայիկ Հարությունյանը՝ ուսանողների հացադուլի մասին
Քաղաքականություն
18.12.2017 | 18:18
Նախորդ անգամ էլ հացադուլը չեմ ողջունել, դա ծայրահեղ քայլ է: Բացի այդ, հիմա այդ գործողություններն ինձ համար անհասկանալի են. անդրադառնալով ուսանողների՝ այսօր հայտարարած հացադուլի ակցիային, ասաց Երևանի ավագանու կրթության, մշակույթի և սոցիալական հարցերի մշտական հանձնաժողովի նախագահ, «Ելք» խմբակցության անդամ Արայիկ Հարությունյանը:
Ըստ Հարությունյանի, նախորդ անգամ հացադուլի և դասադուլի նման ձևով դադարեցումն ու հիմա նորից այդ ամենի մեկնարկումը կթուլացնի ուսանողների պայքարը. «Դեռ 2008 թվականից ես սրա մասին միշտ ասել եմ՝ հացադուլի ինստիտուտը մենք անընդհատ արժեզրկել ենք: Դա պայքարի լուրջ ինստիտուտ է, մի քանի ժամով կամ օրով հացադուլ անելն ու անհասկանալի, երբեմն ծիծաղելի պատճառով այն դադարեցնելը պայքարի այդ ձևի նկատմամբ թերահավատություն է առաջացրել»:
Արայիկ Հարությունյանը նաև հավելեց, որ նախապես էլ պարզ էր՝ իշխանությունները զիջումների չեն գնա. «Ակնհայտ էր, որ Էդուարդ Շարմազանովը, նախարարները, ԱԺ-ն, նախագահականը, այս հարցում զիջումների չեն գնալու, կամ չնչին էին լինելու այդ զիջումները»:
Լիլիթ Շաբոյան
