15.07.2026 | 22:11
ԵՄ-ն երկարաձգել է Ուկրաինայի քաղաքացիների ժամանակավոր պաշտպանության մեխանիզմը, սակայն բացառել է զինապարտներին
ԼՂ-ում հրադադարի ռեժիմի պահպանումը վերահսկելու համար պետք է խաղաղապահներ տեղակայվեն․ Լավրով
Քաղաքականություն
14.10.2020 | 13:23
Լեռնային Ղարաբաղում հրադադարի ռեժիմի պահպանման վերահսկողություն իրականացնելու համար պետք է խաղաղապահներ տեղակայվեն։ Այս մասին ռուսական մի քանի լրատվամիջոցների տված հարցազրույցում ասել է ՌԴ ԱԳ նախարար Սերգեյ Լավրովը։
Նա վստահություն է հայտնել, որ Լեռնային Ղարաբաղի հիմնախնդրի քաղաքական կարգավորումը հնարավոր է։
«Առաջին փուլում, տարածքների ազատումից բացի, պետք է ապաշրջափակվեն նաև հաղորդակցության բոլոր միջոցները, տնտեսական, տրանսպորտային կապերը, տեղակայվեն խաղաղապահներ, որոնք կերաշխավորեն ռազմական գործողություններ չվերսկսելը»,- հայտարարել է Լավրովը։
Հարցին՝ այսինքն, ամեն դեպքում, խաղաղապահնե՞ր պետք է մտցվեն, Լավրովը պատասխանել է․ «Ո՛չ, այդ մեխանիզմը պետք է հիմա փաստացի շփման գծում գործի։ Դրանք այն հինգ շրջանները չեն, որոնք պետք է փոխանցվեն առաջին փուլում՝ համանախագահների առաջարկին համապատասխան։ Հիմա նույնիսկ ոչ թե խաղաղապահները, այլ զինվորական դիտորդները բավարար կլինեն»։
Դիտարկմանը, դրանք պետք է ռուսակա՞ն կողմի դիտորդներ լինեն, Լավրովը դրական է արձագանքել։
«Մենք կարծում ենք, որ միանգամայն ճիշտ կլիներ, եթե լինեին մեր ռազմական դիտորդները, բայց վերջնական խոսքը պետք է կողմերն ասեն։ Եվ, անկասկած, մենք ելնում ենք այն հանգամանքից, որ և՛ Երևանը, և՛ Բաքուն ուշադրություն կդարձնեն մեր դաշնակցային, ռազմավարական գործընկերության հարաբերություններին»,- եզրափակել է նա։
