28.04.2026 | 11:31
Տուապսեի նավթավերամշակման գործարանը կրկին հրդեհվել է ուկրաինական ԱԹՍ-ների հարձակումից հետո
Համայն Ռուսիո պատրիարք Կիրիլը կոչ է արել ԼՂ հակամարտությունը չվերածել միջկրոնական առճակատման
Քաղաքականություն
13.10.2020 | 16:57
Մոսկվայի և Համայն Ռուսիո պատրիարք Կիրիլը կոչ է արել ղարաբաղյան հակամարտության կողմերին օգտագործել հրադադարի մասին Մոսկվայում ձեռք բերված պայմանավորվածությունները՝ խնդրի կարգավորումը քաղաքական դաշտ վերադարձնելու համար։
«Խորապես կարեկցում եմ Լեռնային Ղարաբաղի բնակչությանը, Ադրբեջանի ու Հայաստանի ժողովուրդներին 30 տարուց ավելի շարունակվող զինված հակամարտության նոր փուլի կապակցությամբ։ Կրկին հրետակոծվում են բնակավայրեր, զոհվում են մարդիկ, ավերվում են սրբավայրեր, մշակութային ժառանգության հուշարձաններ, խաղաղ բնակիչների տներ։ Անկեղծորեն կարեկցում եմ այս սարսափելի պատերազմի բոլոր զոհերին, ցավակցում եմ զոհվածների ընտանիքներին։ Ռուսական ուղղափառ եկեղեցին հակամարտության ամենասկզբից արել ու անելու է հնարավոր ամեն բան, որպեսզի Հայաստանի ու Ադրբեջանի հոգևոր առաջնորդների հետ միասին նպաստի Լեռնային Ղարաբաղի բազմաչարչար հողի վրա խաղաղության հաստատման համար»,- հայտարարել է պատրիարք Կիրիլը։
Պատրիարքը դիմել է նաև Ամենայն Հայոց կաթողիկոս Գարեգին երկրորդին և Կովկասի մահմեդականների վարչության նախագահ շեյխ-ուլ-իսլամ Ալլահշուքյուր Փաշա Զադեին՝ կոչ անելով քայլեր ձեռնարկել, որպեսզի հակամարտությունը չվերածվի միջկրոնական առճակատման։
«Կարծում եմ, չափաանց կարևոր են Ռուսաստանի միջնորդությամբ Հայաստանի ու Ադրբեջանի արտգործնախարարների մակարդակով ձեռքբերված պայմանավորվածությունները»,- ասել է Համայն Ռուսիո պատրիարքը՝ կոչ անելով օգտվել հրադադարից, որպեսզի հարցի լուծումը տեղափոխվի քաղաքական դաշտ։
«Հայաստանն ու Ադրբեջանը պատմականորեն եղել և կմնան հարևաններ, հայերն ու ադրբեջանցիները ամեն դեպքում շարունակելու են ապրել կողք-կողքի», – հայտարարել է Համայն Ռուսիո պատրիարքը։
Տաթև Ֆռանգյան
