28.04.2026 | 09:52
Դատախազությունում տեղի են ունեցել կադրային փոփոխություններ
Սերգեյ Շոյգուն Թուրքիայի պաշտպանության նախարարին իր մտահոգությունն է փոխանցել զինյալների տեղափոխման հետ կապված
Քաղաքականություն
13.10.2020 | 13:49
Ռուսաստանի ռազմական գերատեսչությունն ակտիվորեն մասնակցում է Լեռնային Ղարաբաղում իրավիճակի կայունացմանը։ Այս մասին այսօր լրագրողներին հայտնել են ՌԴ Պաշտպանության նախարարությունից, փոխանցում է ՏԱՍՍ-ը։
«Ռուսաստանի Պաշտպանության նախարարությունն իր լիազորությունների սահմաններում ակտիվ մասնակցություն է ունենում Լեռնային Ղարաբաղում իրավիճակի շուտափույթ կայունացման համար Ռուսաստանի Դաշնության կողմից ձեռնարկված նախաձեռնությունների իրականացմանը»,- հայտնել են գերատեսչությունից։
Մասնավորապես, պաշտպանության նախարար Սերգեյ Շոյգուն այս հարցի շուրջ բանակցություններ է վարել տարբեր երկրների իր գործընկերների հետ։
«Այդ աշխատանքի գլխավոր նպատակը Լեռնային Ղարաբաղում ռազմական գործողությունների անհապաղ դադարեցումն ու հակամարտող կողմերի՝ բանակցություններին անցումն է՝ տարածաշրջանում իրավիճակի կարգավորման համար»,- ընդգծել են ՌԴ պաշտպանական գերատեսչությունից։
«Ռուսաստանի Պաշտպանության նախարարությունն առանձնահատուկ մտահոգված է Լեռնային Ղարաբաղի հակամարտության գոտի Մերձավոր Արևելքից ահաբեկչական խմբավորումներից զինյալների տեղափոխման մասին տեղեկություններից»,- ասել են ՊՆ-ից՝ հավելելով, որ այս մտահոգության մասին Սերգեյ Շոյգուն հայտնել է Թուրքիայի ռազմական գերատեսչության ղեկավարին։
Տաթև Ֆռանգյան
