Մեր խնդիրն է Արցախի անկախության ճանաչումը աշխարհի կողմից, և այս ուղղությամբ, չեմ բացառում, որ առաջիկայում քայլեր ձեռնարկվեն․ Վահրամ Պողոսյան

Արցախի անկախության ճանաչման հարցը միանշանակ Արցախի արտաքին քաղաքական օրակարգում է, սակայն Արցախի իշխանությունները չեն կարծում, որ անկախությունը պետք է ճանաչի միայն ՀՀ-ն։ Այս մասին այսօր «Ազատության» ֆեյսբուքյան ասուլիսի ժամանակ ասաց Արցախի Հանրապետության անախագահի խոսնակ Վահրամ Պողոսյանը՝ պատասխանելով հարցին՝ հնարավո՞ր է, արդյոք, որ Արցախի նախագահն այս օրերին դիմի ՀՀ-ին՝ Արցախի անկախության ճանաչման հարցով։

«Քաղաքական ամբողջ պրոցեսը պետք է տարվի այն ուղղությամբ, որ Արցախի անկախությունը ճանաչեն աշխարհի շատ այլ երկրներ։ Մեր խնդիրն է ոչ միայն Արցախի ճանաչումը մեկ պետության, այլ Արցախի ճանաչումը աշխարհի կողմից, և այս ուղղությամբ, չեմ բացառում, որ առաջիկայում քայլեր ձեռնարկվեն։ Սա, ամեն դեպքում, ցույց կտա ժամանակը, ցույց կտան այն պրոցեսները, որ այսօր տեղի են ունենում և այդ պրոցեսներից կախված՝ արդեն կհետևեն մեր արտաքին քաղաքական օրակարգի ամենակարևոր հարցի հետ կապված որոշումները»,- նշեց Պողոսյանը։

Հարցին՝ գործնականում ի՞նչ կտա Արցախին անկախության ճանաչումը, Պողոսյանը պատասխանեց, որ չի կարող շատ փակագծեր բացել, քանի որ տակտիկական խնդիր է․ «Եթե առաջիկայում գործընթացներն ընթանան այնպիսի ճանապարհով, որ Արցախի նախագահն արդեն կհայտարարի, որ դիմում է աշխարհի պետություններին՝ Արցախի անկախության ճանաչման գործընթաց սկսելու, այդ ժամանակ արդեն մենք կտեսնենք, ովքեր են այն համարձակները, որոնք պատրաստ են ճանաչել Արցախի անկախությունը։ Բայց ես համոզված եմ, որ այդպիսիք կան»։

Վահրամ Պողոսյանը, այնուամենայնիվ, նշեց, որ Արցախի անկախության ճանաչումը պետք է առաջին հերթին համաձայնեցվի ԵԱՀԿ Մինսկի խմբի համանախագահների հետ։

«Արցախյան հիմնախնդիրը տարիներ ի վեր միշտ եղել է Մինսկի խմբի հովանու ներքո, և այս ձևաչափի մեջ ենք մենք առաջին հերթին պատկերացնում Արցախի անկախության ճանաչման փաստը։ Բնականաբար, այդ երկրների հետ աշխատանքներ տարվում են, և բոլոր քայլերը՝ անկախ իրավիճակից, մենք պետք է գնահատենք ոչ թե հուզական դաշտում, այլ սթափ, քաղաքական հաշվարկներով։ Բոլորիս խնդիրն Արցախի անկախության վերջնական ճանաչումն է, և դրա համար մեր քայլերը պետք է շատ հավասարակշռված լինեն։ Կարծում եմ՝ մենք բոլորս դրա ականատեսը կլինենք, և դա չի ուշանա։ Բայց դա մի պրոցես է, որ առաջին հերթին պետք է համաձայնեցվի համանախագահող երկրների հետ»,- նշեց Պողոսյանը։

Արցախի նախագահի խոնակը նաև անդրադարձավ հարցին, թե հայկական կողմը ինչ փաստարկներ ունի՝ Ադրբեջանի կողմից ահաբեկչական խմբերի ներգրավման վերաբերյալ։

«Ադրբեջանական կողմի զոհերի մեջ կան բավականին մեծ թվով դիակներ, որոնք ավելի շատ նման են այն մարդկանց, ովքեր Սիրիայում մասնակցել են ահաբեկչական գործողություններ իրականացնելուն։ Կան համապատասխան տեսանյութեր, որոնք ներկայացվում են համապատասխան կառույցներին, կարծում եմ՝ կհրապարակվեն ժամանակի ընթացքում։ Կան նաև հետախուզության տարբեր տվյալներ, որոնց տիրապետում են ոչ միայն հայկական, այլ նաև միջազգային՝ տարբեր գերտերությունների հետախուզական կառույցները»,- նշեց Վահրամ Պողոսյանը։

Անժելա Պողոսյան