Բացահայտորեն ցուցադրվում է ԼՂ-ի հարցը ուժով լուծելու և Արցախի բնակչությանը ոչնչացնելու՝ Բաքվի իրական նպատակը․ Զոհրաբ Մնացականյան. ՏԵՍԱՆՅՈՒԹ

Ադրբեջանը չի կատարում կրակի դադարեցման վերաբերյալ Մոսկվայում համաձայնեցված իր պարտավորությունները: Այս մասին Մոսկվայում ՌԴ ԱԳ նախարար Սերգեյ Լավրովի հետ հանդիպման ժամանակ ասաց ՀՀ ԱԳ նախարար Զոհրաբ Մնացականյանը:

Նա նշեց, որ այն, ինչին բախվել է Լեռնային Ղարաբաղի ժողովուրդը, էքզիստենցիալ վտանգի մարմնավորում է, որը հասունանում էր տասնյակ տարիների ընթացքում, որի մասին խոսել են անընդհատ:

«Մենք կարողացել ենք հասնել որոշակի արդյունքների՝ շնորհիվ Ձեր և նախագահ Վլադիմիր Պուտինի ներգրավվածության: Մեզ հաջողվեց նախարարների մակարդակով համաձայնեցնել կրակի դադարեցման վերաբերյալ համատեղ հայտարարություն: Մենք բարձր ենք գնահատում Ձեր անձնական և Ռուսաստանի Դաշնության նախագահի ներդրումը, որ կարողացանք հասնել այսպիսի արդյունքի»,- ասաց Մնացականյանը:

Նախարարն ընդգծեց մարտական գործողությունների դադարեցման անհրաժեշտությունը՝ խիստ կարևորելով Ռուսաստանի դերն այս հարցում: «Ցավոք, այս պահին չենք կարող գործնականում արձանագրել, որ ունենք լիարժեք կրակի դադարեցում: Եվ բառացիորեն նախքան այստեղ գալը շարունակում էր տեղեկություն ստացվել, որ Ադրբեջանը չի կատարում կրակի դադարեցման իր պարտավորությունները: Այս առումով ես ուզում եմ ընդգծել վավերացնող մեխանիզմների ներդրման կարևորությունը, որով կարող ենք հասնել այդ ռեժիմի պահպանմանը»,- ասաց Մնացականյանը:

ՀՀ ԱԳ նախարարի խոսքով՝ սեպտեմբերի 27-ից սկսած շարունակվում է Արցախի ժողովրդի դեմ լայնամասշտաբ ագրեսիան Ադրբեջանի կողմից:

«Ընդ որում, բացահայտորեն ներկայացվում են Լեռնային Ղարաբաղի հակամարտության՝ ուժային ճանապարհով լուծման իրական նպատակները»,- նշեց Մնացականյանը՝ ընդգծելով, որ այլևս գաղտնիք չեն Արցախի բնակչության ֆիզիկական բնաջնջման նկրտումները:

Մնացականյանը հայտնեց նաև, որ հակառակորդը խաղաղ բնակչության դեմ օգտագործել է հրետանի, հրթիռներ, անօդաչու թռչող սարքեր, ավիացիա: «Կան զոհեր և վիրավորներ Ադրբեջանի կողմից կասետային ռումբերի կիրառման հետևանքով»,- ՀՀ ԱԳ նախարարը:

Մանրամասները՝ տեսանյութում: