08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Անկարայի ճնշմամբ Բաքուն խափանում է Արցախում ՌԴ-ի միջնորդական ջանքերը․ Վաղարշակ Հարությունյան
Քաղաքականություն
12.10.2020 | 13:10
Ադրբեջանի իշխանությունները, Թուրքիայի անմիջական ճնշման ներքո, խափանում են Լեռնային Ղարաբաղում ՌԴ-ի միջնորդական առաքելությունը։ ՏԱՍՍ-ի հետ զրույցում նման կարծիք է հայտնել ՀՀ վարչապետի խորհրդական, պաշտպանության նախկին նախարար Վաղարշակ Հարությունյանը։
Նրա խոսքով՝ այսպիսով Բաքուն փորձում է բարձրացնել Անկարայի դերը արցախյան հակամարտության կարգավորման գործում։
«Արցախում ներկայում դաժան մարտեր են ընթանում՝ չնայած ՌԴ-ի միջնորդությամբ Մոսկվայում մարդասիրական նպատակներով հրադադարի մասին համաձայնություն է ձեռք բերվել։ Սա նշանակում է, որ Անկարան ամեն կերպ ճնշում է գործադրում ադրբեջանական իշխանությունների վրա, իսկ վերջիններն իրենց հերթին խափանում են ՌԴ-ի միջնորդական առաքելությունը՝ նպատակ ունենալով բարձրացնել հակամարտության կարգավորման գործում Թուրքիայի դերը»,- ասել է նա։
Հարությունյանը հավելել է նաև, որ Երևանը բարձր է գնահատում Լեռնային Ղարաբաղում հրադադարի հաստատման ուղղությամբ ՌԴ-ի միջնորդական ջանքերը, ինչպես նաև իրականացնում է Մոսկվայում կայացած եռակողմ հանդիպման արդյունքում ձեռք բերված պայմանավորվածությունները։
«Մենք բարձր ենք գնահատում Ռուսաստանի միջնորդական դերը, մասնավորապես՝ Լեռնային Ղարաբաղում մարդասիրական նպատակով հրադադարի ռեժիմի հաստատմանն ուղղված ՌԴ նախագահ Պուտինի և ԱԳ նախարար Լավրովի ջանքերը։ Չնայած Բաքուն, խախտելով հրադադարի շուրջ պայմանավորվածությունը, շարունակում է Արցախի դեմ ագրեսիան, Երևանն իրականացնում է Մոսկվայում ԱԳՆ ղեկավարների հանդիպման արդյունքներով ձեռք բերված համաձայնությունները»,- ընդգծել է Վաղարշակ Հարությունյանը։
