25.05.2026 | 00:01
Մայիսի 25-ի վաղ առավոտյան ՀՀ ԶՈւ ավիացիան Երևանի կենտրոնում կատարելու է թռիչք․ ՊՆ
«Ռադիոհաճախականությունները չվերականգնվող ռեսուրսներ են». նորագույն տեխնոլոգիաների կիրառումն առանց սպեկտրի արդյունավետ կառավարման, անհնար է. համաժողովն ամփոփվեց
15.12.2017 | 19:00
Ռադիոհաճախականային սպեկտրի կառավարման տարածաշրջանային համագումարն այս տարի անցկացվեց Հայաստանում: «Global Europe» ընկերության կողմից կազմակերպված այս միջոցառմանն իր գործուն մասնակցությունն ունեցավ նաև ՀՀ տրանսպորտի, կապի և տեղեկատվական տեխնոլոգիաների նախարարությունը:
Համաժողովը մեկնարկեց դեկտեմբերի 12-ին: 20 երկրից ժամանած 100 մասնագետ-ներկայացուցիչներ 3 օր շարունակ անդրադարձան սպեկտրի կառավարման բոլոր ասպեկտներին: Ամփոփվեցին վերջին տարիներին ռադիոհաճախականությունների ոլորտի զարգացումները, ուրվագծվեցին ցանցային տեխնոլոգիաների զարգացման առաջիկա ուղղությունները, սպեկտրի կառավարման արդյունավետության բարձրացման քաղաքականությունը:
Նորագույն տեխնոլոգիաների կիրառումն ու կատարելագործումն առանց սպեկտրի արդյունավետ կառավարման, ռադիոհաճախականությունների բազմակի կամ համատեղ օգտագործման, անհնար է, որովհետև, ինչպես համաժողովում բազմիցս շեշտվեց, «ռադիոհաճախականությունները չվերականգնվող ռեսուրսներ են»:
Որպես համագումարի քննարկումների շարունակություն և արդյունք` համապատասխան մասնագետների կողմից մոտ ապագայում կկազմվի փաստաթուղթ, որը Հեռահաղորդակցության միջազգային միության անդամ-պետությունների համար կունենա ոչ թե պարտադրողական, այլ ուղղորդող բնույթ: Ավելին, այն հեռահաղորդակցության ոլորտը սպասարկող օպերատորներին, սարքեր արտադրող ընկերություններին կօգնի նաև ճիշտ կողմնորոշվել իրենց տեխնոլոգիաների ներդրման ու զարգացման հարցում: Փաստաթուղթը կարտացոլի ԱՊՀ տարածաշրջանում սպեկտրի կառավարման միասնական մոտեցում:
Հայաստանում նմանատիպ մասշտաբային միջոցառման անցկացումը ոչ միայն չափազանց պատասխանատու էր, այլև օգտակար: Մեր երկիրը, ունենալով զարգացած հեռահաղորդակցության ոլորտ և կապի հասանելիության բարձր ցուցանիշներ, խնդիր ունի կարգավորելու սպեկտրի կառավարման մոտեցումները հարևան պետությունների հետ և կիրառելու միասնական, բոլոր կողմերի համար ընդունելի քաղաքականություն:
Համաժողովին հաջորդեց «Ռադիոկապի ռեգլամենտի գործնական օգտագործում» ՀՄՄ տարածաշրջանային երկօրյա սեմինարը: Այն անցավ ռեգլամենտի պրակտիկ օգտագործման և մասնագիտական այլ հարցերի շուրջ զեկույցներ ներկայացնելու և քննարկելու ձևաչափով:
