18.11.2024 | 15:27
Ադրբեջանցի պաշտոնյան հայտարարել է, թե «ՀՀ-ի ռազմականացումը հարկադրել է Բաքվին ավելացնել պաշտպանական ծախսերը»
Վարչական և քրեական պատասխանատվություն՝ ռազմական դրության կանոնները խախտելու համար․ ԱԺ-ն ամբողջությամբ ընդունեց օրինագիծը․ ՏԵՍԱՆՅՈՒԹ
Քաղաքականություն
09.10.2020 | 19:37
Ազգային ժողովն այսօր հրավիրված արտահերթ նիստում երկրորդ ընթերցմամբ և ամբողջությամբ ընդունեց Կառավարության ներկայացրած նախագիծը, որով առաջարկվում է տույժեր սահմանել Հայաստանի ողջ տարածքում հայտարարված ռազմական դրության սահմանափակումները խախտելու համար։
Վարչական իրավախախտումների վերաբերյալ ՀՀ օրենսգրքում լրացումներ կատարելու մասին և կից ներկայացված օրինագծերի փաթեթը ստացավ պատգամավորների 72 կողմ ձայները։
«Օրենսդրության վերլուծությունը ցույց է տալիս, որ ռազմական դրության ընթացքում միջոցառումներն ապահովելու տեսանկյունից մի շարք իրավահարաբերություններ կարգավորված չեն: Նախագծերի փաթեթով առաջարկվում է ամբողջականացնել ու հստակեցնել ռազմական դրության իրավական ռեժիմը խախտելու դեպքում պատասխանատվության միջոցների շրջանակը: Սահմանափակումների չպահպանման կամ միջոցառումների խախտման համար նախատեսվել են վարչական պատասխանատվության միջոցներ»,- ասաց արդարադատության նախարար Ռուստամ Բադասյանը:
Վարչական պատասխանատվության միջոցներ են սահմանվել ազատ տեղաշարժվելու իրավունքի, ֆինանսատնտեսական գործունեության, ապրանքների շրջանառության, պարետային ժամի, կարծիքի արտահայտման ազատության սահմանափակումները խախտելու դեպքում, անհետաձգելի աշխատանքներին ներգրավվելուց կամ տրանսպորտային միջոց տրամադրելուց հրաժարվելու դեպքում, ռազմական դրության ժամանակ գործադուլներ, հավաքներ կազմակերպելու, մասնակցելու և կազմակերպությունների գործունեությունը դադարեցնող կամ կասեցնող այլ միջոցառումների արգելքը խախտելու համար և մի շարք այլ դեպքերում: Առավել մեծ տույժ է նախատեսվում նշված խախտումներից որևէ մեկը վարչական տույժը նշանակելու օրվանից հետո կրկին կատարելու համար: Նախագծում ներկայացված են համապատասխան տույժերի չափերը:
Առաջինից երկրորդ ընթերցմամբ քննարկման ընթացքում նախագծում կատարվել են որոշ փոփոխություններ: Մասնավորապես` լրատվական գործունեություն իրականացնողի կողմից խախտումը չվերացնելու հետևանքը տարբերակվել է լրատվական գործունեություն չիրականացնող անձի դեպքից: Եթե լրատվական գործունեություն իրականացնողը չի վերացրել խախտումը, տուգանքի գումարը կկազմի 1 մլն-ից 1.5 մլն դրամի շրջանակում, իսկ լրատվական գործունեություն չիրականացնողի դեպքում՝ 700 հազարից 1 մլն դրամ: Նախագծերի փաթեթում այլ փոփոխություններ ևս կատարվել են:
Մանրամասները՝ տեսանյութում։
