Քեզ հետ ենք, Հայաստան, Ադրբեջանի արածն աններելի է. աշխարհահռչակ ո՞ր աստղերն են սատարում մեր երկրին. ՏԵՍԱՆՅՈՒԹ

«Քեզ հետ եմ, Հայաստա՛ն», «Ճանաչե՛նք Արցախը», «Կվերականգնե՛նք կորցրածը», «Միացե՛ք դրամահավաքին». այս օրերին Ադրբեջանի՝ Արցախի դեմ սանձազերծած ռազմական գործողություններին իրենց կոչերով և զորակցությամբ անդրադառնում են նաև աշխարհահռչակ աստղերը: Այսպիսով՝ անգլիացի հանրահայտ երաժիշտ, երգահան «Գրեմմի»-ի դափնեկիր Փիթեր Գաբրիելը դիմել է երկրպագուներին և պատկան կառույցներին՝ խոսելով պատերազմի մասին։

«Կռիվը, որն այժմ ընթանում է Հայաստանի և Ադրբեջանի միջև, սարսափելի է, և մենք պետք է ամեն գնով խրախուսենք հրադադարի հաստատումը, բայց լուրերը, որ նախագահ Էրդողանը տեղակայել է 80.000-անոց թուրքական զորք Հայաստանի հետ սահմանին, սարսափազդու և մտահոգիչ են»,- գրել է նա՝ խնդրելով քաղաքական գործիչներին հորդորել Բրյուսելին, ՆԱՏՕ-ին և ՄԱԿ-ին միջամտել, քանի դեռ ավելի մեծ թվով մարդկային կորուստներ չեն եղել:

Ադրբեջանի ագրեսիվ գործողություններին անդրադարձել է նաև դասական երաժշտության ոլորտի մեկ այլ ներկայացուցիչ՝ հայտնի դաշնակահար Եվգենի Կիսինը: Նա ինստագրամյան իր էջում գրել է․ «Քեզ հետ եմ, Հայաստան»։ Գրառմանը կից Կիսինը հրապարակել է տեսանյութ, որտեղ կատարում է Կոմիտասի «Կռունկ»-ը։

Իտալացի ականավոր դիրիժոր և դաշնակահար Ֆաբիո Մաստրանջելոն էլ դատապարտում է Ադրբեջանի՝ Արցախի դեմ սանձազերծած ռազմական գործողությունները: Նա ֆեյսբուքյան պաշտոնական էջում գրել է. «Այն, ինչ կատարվում է Լեռնային Ղարաբաղում Ադրբեջանի, Թուրքիայի, ինչպես նաև ահաբեկիչ վարձկանների ձեռքով, բացարձակ աններելի է»: Աշխարհահռչակ ջութակահար Սերգեյ Խաչատրյանն էլ իր հետևորդներին կոչ է արել աշխարհին տեղեկացնել կատարվող իրադարձությունների մասին և մասնակցել համազգային դրամահավաքին:

«Սեպտեմբերի 27-ից սկսած իմ հայրենի Հայաստանը տառապում է Ադրբեջանի հասցրած պատերազմի պատճառով, որը հակառակորդը իրականացնում է դաշնակից Թուրքիայի հետ համատեղ։ Թուրքիան Ադրբեջանին բացահայտ կերպով սատարել է՝ տրամադրելով ռազմական տեխնիկա, սիրիացի վարձկաններ և միջազգային ահաբեկիչներ»,- ֆեյսբուքյան պաշտոնական էջում գրել է երաժիշտը՝ շեշտելով, որ հրետակոծվում են գյուղեր, քաղաքներ, թիրախավորվում է Արցախի և Հայաստանի խաղաղ բնակչությունը։

Աշխարհահռչակ ռոք երաժիշտ, «System of a Down» խմբի մենակատար Սերժ Թանկյանն էլ իր հերթին խոսել է այլ երկրների կողմից Արցախի անկախության ճանաչման կարևորության մասին: «Անհրաժեշտ է, որ Արցախի անկախությունը ճանաչվի այլ երկրների կողմից՝ պաշտպանելու Արցախի խաղաղ բնակիչներին Ադրբեջանի և Թուրքիայի անօրինական ու անխոհեմ ահաբեկչական գործողություններից»,- ֆեյսբուքյան իր էջում գրել է Թանկյանը:

Նա նաև կոչ է արել միանալ համահայկական դրամահավաքին, ինչպես նաև իր էջում կիսվել է ՀՀ վարչապետ Նիկոլ Փաշինյանի՝ միջազգային լրատվամիջոցներին տված հարցազրույցներով և Արցախին նվիրված կատարումով: Կանադահայ հանրահայտ կինոռեժիսոր Ատոմ Էգոյանը և նրա կինը՝ դերասանուհի Արսինե Խանջյանը ևս անմասն չեն մնացել Արցախին զորակցություն հայտնելու գործից: Ա

տոմ Էգոյանը հարցազրույց է տվել կանադական CTV ալիքին՝ բարձրաձայնելով Թուրքիայի օգնությամբ Ադրբեջանի սկսած պատերազմի մասին: Բացի այդ՝ նրանք հանդես են եկել համատեղ տեսաուղերձով՝ աջակցություն հայտնելով Արցախում և Հայաստանում ապրող քույր-եղբայրներին. «Ողջ սփյուռքը ոտքի է ելել և կանգնած է արցախահայության կողքին, պատրաստ է աջակցել ու անել ամեն բան, որպեսզի վերականգնենք կորցրածը և ստեղծենք արժանավայել միջավայր»,-ասել է Ատոմ Էգոյանը: Արսինե Խանջյանն էլ դիմել է հայ մայրերին՝ նշելով, որ կիսում է նրանց ցավը: