18.11.2024 | 17:31
Դեռ հրաժարական չի տվել, հիվանդանոցում է․ Փարաքար համայնքի ղեկավարի տեղակալը՝ համայնքապետի մասին
Ինչ է տիրում ադրբեջանական կողմում․ ադրբեջանցի բժիշկը Լապշինին պատմել է մարտադաշտում ցաքուցրիվ եղած զոհերի, վիրավորների ու իշխանությունների մասին
Քաղաքականություն
08.10.2020 | 15:59
Հայտնի բլոգեր Ալեքսանդր Լապշինը ֆեյսբուքյան իր էջում գրում է, որ Ադրբեջանում բնակվող մի բժիշկ իրեն սարսափելի պատմություններ է փոխանցել ադրբեջանական կողմում տիրող իրավիճակի մասին։
Բլոգերը, մասնավորապես, գրել է․
«Հասկանալի պատճառներով չեմ ասի, թե ով է նա։ Կասեմ միայն, որ բժիշկը փրկում է վիրավոր ադրբեջանցիների կյանքը, որոնց արդեն 11 օր է՝ հսկայական թվերով բերում են ռազմաճակատից։ Նա գրել է, որ շատ վիրավոր զինվորներ ասում են, թե երկրի իշխանությունները թույլ չեն տալիս մարտի դաշտից դուրս բերել իրենց հարյուրավոր վիրավորներին, որոնք սարսափելի տանջանքների մեջ ժամերով, անգամ օրերով գտնվում են գնդակոծության տակ։ Եվ սա՝ ի հավելումն ավելի քան 2․000 ադրբեջանցի զինվորների դիակների, որոնց ոչ ոք չի տարհանում մարտի դաշտից, քանի որ Բաքուն հրաժարվում է համագործակցել Կարմիր խաչի հետ։
Երիտասարդ տղաների անդամահատված մարմինները ցաքուցրիվ են եղած Ջաբրայիլի հարավից մինչև Թալիշի մատույցներ՝ հյուսիս։ Եվս մի քանի օր՝ և արդեն հնարավոր չի լինի ճանաչել նրանցից շատերի դիակները՝ նեխելու գործընթացի պատճառով։
Եթե վիրավորվեք ձեր դիրքերում, ասենք՝ հրետանային կրակից, համարեք, որ ձեր բախտը բերել է։ Ձեզ կփրկեն, ձեր համար պատերազմը կավարտվի, անգամ եթե ձեռք կամ ոտք եք կորցրել։ Կարևորը ողջ ես։ Բայց եթե ադրբեջանցի զինվորը հայտնվի կրակի տակ կամ հետախուզական կամ հատուկ նշանակության ջոկատի անդամ լինի ու վիրավորվի իր դիրքերից հեռու, նրան սպասվում է տառապալի մահ։ Նրան ոչ ոք չի օգնի։ Յուրայինները դեն կնետեն, իրենց ինչի՞ն է պետք կրակի տակից վիրավոր ընկերոջը դուրս բերել, իրենք իրենց կփրկեն։ Վիրավորները ցավից գոռում են, օգնություն են խնդրում, սակայն նրանց ոչ ոք չի օգնում։ Յուրայինները վաղուց իրենց դեն են նետել ու մոռացել են, իսկ հայերը չեն ձգտում վիրավորների վերցնել, առավել ևս՝ վտանգելով իրենց կյանքը։ Հարյուրավոր ադրբեջանցի զինվորներ մահանում են տառապանքների մեջ այնտեղ, որտեղ նրանք վիրավորվել են որովայնից կամ արկերի բեկորներից։
Չնայած Կարմիր խաչի կոչերին՝ Ադրբեջանի ղեկավարները դեռևս չեն գնում ժամանակավոր հրադադարի, որպեսզի զոհերի դիերը դուրս բերեն ու փորձեն փրկել վիրավորներին։
Միգուցե ինձ ինչ-որ մեկը կասի՝ «ինչ ակնկալել ադրբեջանցիներից, նրանք իրենք են ագրեսորները», բայց ես չեմ համաձայնի։ Այս բոլոր մարդիկ զինվորներ են։ Նրանք հրաման են կատարում և Ալիևը հանցագործություն է կատարում՝ թույլ չտալով արժանապատիվ կերպով հուղարկավորել զոհվածներին կամ փրկել նրանց, ովքեր դեռ ողջ են»։
Տաթև Ֆռանգյան
