Նարիշկինի հայտարարությանը` Սիրիայում ահաբեկիչների հետ կապված, գուցե գործողություններ են հաջորդել. Անդրանիկ Քոչարյան. ՏԵՍԱՆՅՈՒԹ

11 օր անց Վլադիմիր Պուտինը հստակ հնչեցրեց, որ մենք ռազմավարական գործընկերներ ենք և մենք պայմանագրային պարտավորություններ ունենք: Դրանից առաջ ՌԴ տարբեր պաշտոնյաներ արտահայտել էին պաշտոնական տեսակետներ, իսկ երեկ կարևոր հայտարարություն արեց Ռուաստանի արտաքին հետախուզության ծառայության տնօրեն Սերգեյ Նարիշկինը, որը հաստատեց՝ Արցախյան պատերազմի մեջ հակառակորդն օգտագործում է տեռորիստական խմբեր, որոնք Թուրքիայից ուղարկվում են Արցախի հակամարտության գոտի: Այս մասին Factor TV-ին տված հարցազրույցում ասաց ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը՝ անդրադառնալով ՌԴ նախագահ Վլադիմիր Պուտինի՝ «Ռոսիա 24» հեռուստաընկերությանը տված հարցազրույցին:

Ռուսական պետական հեռուստաընկերության հետ զրույցում Պուտինը նշել էր, որ ՀԱՊԿ-ի շրջանակում Ռուսաստանը պատրաստ է կատարել իր պարտավորությունները Հայաստանի հանդեպ: Նա, սակայն, շրջանցել է ռուսական 102-րդ ռազմաբազայի պարտավորությունները:

Ըստ Անդրանիկ Քոչարյանի, սակայն, Պուտինի կողմից չի շրջանցվել 102-րդ ռազմաբազան. «Դրա մասին իմաստ չկա խոսելու, որովհետև դրանք արձանագրված են համապատասխան պայմանագրի մեջ։ Եթե դրա անհրաժեշտությունը լինի, 102-րդ ռազմաբազան իր առջև դրված պարտավորությունները կկատարի: Պարոն Պուտինը երբ խոսում է միջազգային պարտավորություններից, դրա մեջ մտնում է նաև 102-րդ ռազմաբազայի կրառումը»:

Անդրանիկ Քոչարյանն անդրադարձավ նաև ՌԴ արտաքին հետախուզության ծառայության տնօրեն Սերգեյ Նարիշկինի հայտարարությանը, որ ռազմական գործողություններին ադրբեջանական կողմը ներգրավել է ահաբեկիչների:

«Նարիշկինի հայտարարությունից հետո Սիրիայում ահաբեկիչների հետ կապված գործողություններ, գուցե, եղել են, և դրանով է պայմանավորված իրենց այսօրվա ոչ ակտիվ գործողությունները: Ահաբեկիչներն ադրբեջանական բանակի հիմնական սնուցող գործոններն էր»,- ասաց նա:

Հարցազրույցն ամբողջությամբ՝ տեսանյութում:

Նարեկ Կիրակոսյան