Միայն Պուտինն է ընդունակ անել այն հնարավորը, որը կարող է որոշիչ դառնալ Լեռնային Ղարաբաղի համար․ Սամվել Կարապետյան

Միայն Ռուսաստանն իրավունք ունի միջամտել Լեռնային Ղարաբաղի հակամարտությանը։ Այս մասին հայտարարել է «Տաշիր» ընկերությունների խմբի հիմնադիր Սամվել Կարապետյանը, գրում է ՌԻԱ Նովոստին։

«Այս լարված օրերին, երբ ողջ աշխարհը կոչ է անում կողմերին նստել բանակցությունների սեղանի շուրջ, լուրջ մտահոգություն է արտահայտում Թուրքիայի դիրքորոշումը, որը դիտավորյալ կերպով սրում է Լեռնային Ղարաբաղում հակամարտությունը՝ վտանգ ստեղծելով իր պատմական հողերի վրա հայ ազգի գոյությանը։ Այս առումով համոզված եմ, որ եթե ինչ-որ երկիր էլ իրավունք ունի ու կարող է միջամտել իրավիճակին, ապա դա կարող է լինել Ռուսաստանը»,- ասել է Կարապետյանը։

Նա նշել է, որ հրադադարի հարցում շահագրգիռ կողմերը պետք է հնարավորինս շուտ գիտակցեն Ռուսաստանին ներգրավելու անհրաժեշտությունը։

«Այսօրվա դրությամբ, Ռուսաստանը նախկինի պես տարածաշրջանում հանդարտության միակ երաշխավորն է։ Համոզված եմ, որ ներկա իրավիճակում հենց նախագահ Պուտինն է ընդունակ անել այն հնարավորը, որը կարող է որոշիչ դառնալ Լեռնային Ղարաբաղի ապագայի համար։ Կարելի է որքան ասես երկար պատրանքներ ունենալ, թե որևէ այլ ուժերի միջամտությունը կարող է օգնել Ղարաբաղյան հակամարտության լուծմանը, սակայն ակնհայտ է, որ միայն ռուսական խաղաղապահ ջանքերն են ի վիճակի դադարեցնել պատերազմը։ Որքան շուտ դա հասկանան նրանք, ովքեր շահագրգռված են հակամարտության կարգավորման մեջ, այնքան շուտ հնարավոր կլինի խուսափել նորանոր կորուստներից և անցնել խաղաղ բանակցությունների ձևաչափին»,- ասել է Կարապետյանը։