19.01.2026 | 23:38
Ռուբիոն բարձր է գնահատել Ադրբեջանի կառավարության կողմից Հայաստան վառելիքի մատակարարումները
Ղրղզստանում ցուցարարները գրավել են խորհրդարանի, քաղաքապետարանի ու ՆԳՆ շենքը․ խորհրդարանական ընտրություններն անվավեր են ճանաչվել
Քաղաքականություն
06.10.2020 | 13:17
Ղրղզստանի ԿԸՀ-ն անվավեր է ճանաչել հոկտեմբերի 4-ին տեղի ունեցած խորհրդարանական ընտրությունների արդյունքները, գրում է «Իզվեստիան»։
Խորհրդարանի 120 տեղի համար պայքարում էր 16 կուսակցություն։ Ըստ նախնական արդյունքների՝ քվեարկությանը մասնակցած կուսակցություններից միայն 4-են անցել խորհրդարան։
Ընտրությունների հաջորդ օրն իսկ այն կուսակցությունների կողմնակիցները, որոնք չեն կարողացել հաղթահարել նվազագույն շեմը, դուրս են եկել Բիշքեկի փողոցներ։ Բողոքի ցույցերի ժամանակ ցուցարարները գրավել են մի շարք կառավարական շենքեր, այդ թվում՝ խորհրդարանի, քաղաքապետարանի ու ՆԳՆ-ի, ինչպես նաև Հանրային հեռուստառադիոընկերության շենքը։
Բացի այդ, ցուցարարները բանտարկությունից ազատ են արձակել երկրի նախկին ղեկավար Ալմազբեկ Աթամբաևին ու նախկին վարչապետ Սապար Իսակովին, ինչպես նաև մի շարք պատգամավորների։
Երկրի նախագահ Սոորոնբայ Ժեենբեկովը տեղի ունեցածն անվանել է իշխանափոխության փորձ։ Նա հայտարարել է, որ ԿԸՀ-ին առաջարկել է մանրակրկիտ ուսումնասիրել ընտրություններում գրանցված խախտումները և, անհրաժեշտության դեպքում, չեղարկել դրանց արդյունքները։ Նա նաև կոչ է արել ընդդիմադիր քաղաքական գործիչներին՝ հանդարտեցնել իրենց կողմնակիցներին։
