29.04.2026 | 13:27
Ավանեսյանը՝ Բաքվում պահվող գերիների առողջական վիճակի և ադրբեջանական պատվիրակության այցի մասին․ ՏԵՍԱՆՅՈՒԹ
Վրաստանի նախագահն առաջարկով դիմել է Փաշինյանին ու Ալիևին
Քաղաքականություն
03.10.2020 | 14:29
Վրաստանի նախագահը Հայաստանի և Ադրբեջանի իշխանությանը երկխոսություն սկսելու և հրադադարի կոչ է անում: Այս մասին Սալոմե Զուրաբիշվիլին հայտարարել է Վրաստանի Անվտանգության խորհրդի նիստի ավարտից հետո, հաղորդում է Վրաստանի Առաջին ալիքը։
«Ցանկանում եմ ողջ վրաց հասարակության անունից խորը մտահոգություն հայտնել այն զոհերի համար, որոնք այս հակամարտության հետևանքով ունեն մեր հարևան երկրները: Ցանկանում եմ, դիմել մեր երկու հարևան և բարեկամ երկրների նախագահներին, իշխանությանը, որքան հնարավոր է՝ արագ վերականգնել նրանց միջև երկխոսությունը, ցանկանում եմ իրավիճակի կայունացման և հրադադարի կոչ անել: Սա մեր երեք երկրների գլխավոր ընդհանուր շահն է, որպեսզի այս տարածաշրջանին վերադարձնեն կայունություն, խաղաղություն և դրա հսկայական տնտեսական դերն աշխարհի համար: Սա մեր համատեղ ձեռքբերումն է և սա այն է, որին մենք պետք է զգուշորեն վերաբերենք: Ցանկանում եմ դիմել նաև Մինսկի խմբին և դրա համանախագահներին, ովքեր այս հակամարտության նկատմամբ ունեն առանձնահատուկ պատասխանատվություն, որ մենք պատրաստ ենք, որ Թբիլիսին լինի այն վայրը, որտեղ հնարավոր կլինի վարել ցանկացած բանակցություն: Մենք ամեն ինչի պատրաստ ենք, ինչը ցանկալի կլինի կողմերի համար»,- հայտարարել է Սալոմե Զուրաբիշվիլին:
Վրաստանի նախագահը նշել է, որ տարածաշրջանում խաղաղության և կայունության պահպանումը նաև Եվրամիության շահերից է բխում:
«Ցանկանում եմ նաև դիմել Եվրամիությանը՝ մենք այս տարածաշրջանի Արևելյան գործընկերության երկրներն ենք: Եթե դրացիությունը որևէ նշանակություն ունի, և ես վստահ եմ, որ ունի, այսօր մեր տարածաշրջանում կայունությունը, խաղաղությունը Եվրամիության շահերից է։ Մեկ անգամ ևս ցանկանում եմ կրկնել՝ սա մեր՝ երեք երկրների և մեր քաղաքացիների ընդհանուր նպատակն է: Մեզ համար չկա ավելի կարևոր բան, քան խաղաղությունը և կայունությունը»,- հայտարարել է Սալոմե Զուրաբիշվիլին:
