19.01.2026 | 23:38
Ռուբիոն բարձր է գնահատել Ադրբեջանի կառավարության կողմից Հայաստան վառելիքի մատակարարումները
Սվետլանա Տիխանովսկայան հայտարարել է ստվերային կառավարություն ձևավորելու մասին
Քաղաքականություն
30.09.2020 | 15:21
Բելառուսի նախագահի նախկին թեկնածու Սվետլանա Տիխանովսկայան սկսում է ստվերային կառավարություն ձևավորել։ Նա նման հայտարարություն է արել իր Telegram-ալիքի միջոցով, գրում է «Ինտերֆաքսը»։
«Տիխանովսկայան մարդու իրավունքների պաշտպան է նշանակել հայտնի բելառուս իրավապաշտպան ու իրավաբան Գարի Պոգոնյայլոյին։ Տնտեսական բարեփոխումների ներկայացուցիչ է նշանակվել տնտեսագետ Ալես Ալեխնովիչը»,- ասվում է հաղորդագրության մեջ։
Պոգոնյայլոն եղել է Բելառուսում մարդու իրավունքների հարցերով բազմաթիվ սկանդալային գործերով փաստաբան, այդ թվում՝ բելառուս լրագրողներ Պավել Շերեմետի ու Դմիտրի Զավադսկոյի գործերով։ Ավելի քան 20 տարի նա Բելառուսի Հելսինկյան կոմիտեի նախագահի տեղակալն է։
Ալեխնովիչն էլ CASE-Belarus վերլուծական կենտրոնի փոխնախագահն է, որը զբաղվում է երկրի տնտեսական զարգացման հարցերի ուսումնասիրություններով։
«Ալեքսանդր Լուկաշենկոյի վարչակազմը ոչ միայն լեգիտիմ չէ, այլև չի կարողանում հաղթահարել իր առջև դրված խնդիրները։ Մենք չենք կարող անգործության մատնվել ու դիտել, թե ինչպես է մեր երկիրն է՛լ ավելի խորանում ճգնաժամի մեջ։ Այդ իսկ պատճառով, որպեսզի մենք ապահովենք նոր ընտրությունների անցկացումը, ես շարունակում եմ մեր աշխատանքը Բելառուսում գործող բոլոր ժողովրդավար ուժերի միավորման ուղղությամբ»,- հայտարարել է Տիխանովսկայան։
