Կարեն Շահնազարովը՝ Կրեմլին․ «Ռուսաստանը կայսրությո՞ւն է, թե՞ առևտրային ձեռնարկություն»

Ռուսաստանաբնակ հայտնի ռեժիսոր Կարեն Շահնազարովը «Երեկո Վլադիմիր Սոլովյովի հետ» հաղորդման շրջանակում ՌԴ իշխանություններին կոչ է արել, Լեռնային Ղարաբաղում իրավիճակի սրման և ընդհանրապես եվրասիական տարածքում մեծաթիվ միջադեպերի լույսի ներքո, կողմնորոշվել երկրի կարգավիճակի հարցում։

Նա նշել է, թե հասկանում է կա՛մ Հայաստանին, կա՛մ Ադրբեջանին օգնելու աջակցելու հարցում իրավիճակի ամբողջ բարդությունը։

«Մի կողմից՝ Հայաստանը դաշնակից է, ՀԱՊԿ անդամ։ Բացի այդ՝ այնտեղ մենք ռազմաբազա ունենք։ Մյուս կողմից՝ Ադրբեջանը նախկին խորհրդային հանրապետություն է, նաև ժողովուրդ, որը երկար ժամանակ ապրել է Ռուսական կայսրության կազմում։ Եվ նրանց հետ հարաբերությունները նույնպես կարևոր են։ Բազմաթիվ ընդհանուր տնտեսական նախագծեր կան, բազմաթիվ կապեր․․․»,- ասել է Շախնազարովը։

Նա, սակայն, հիշեցրել է, որ Ռուսաստանն անձամբ իր համար չի կարողանում պատասխանել գլխավոր հարցին։

«Տպավորություն ունեմ, որ դա մետաֆիզիկական հարց է։ Եվ Ռուսաստանն իր համար մինչև հիմա չի լուծել։ Ռուսաստանն ամեն դեպքում Կայսրությո՞ւն է, թե՞ ինչ-որ առևտրային ձեռնարկություն, որը խողովակներ է անցկացնում, նավթի առևտուր է անում, պատվաստանյութեր է ստեղծում և վաճառում։ Մի կողմից՝ կարելի է ինքնուրույն հեռանալ։ Եվ Ռուսաստանի բազմաթիվ քաղաքացիների համար տրամաբանությունը հասկանալի կլինի․ իսկ ինչո՞ւ պետք է մեր տղաները զոհվեն։ Մյուս կողմից՝ եթե ինքնուրույն հեռանանք, հաջորդ անգամ այդ երկրներից ցանկացածը կասի՝ իսկ մեզ ի՞նչ է կապում Ռուսաստանի հետ, ի՞նչ սպասենք, ինչների՞ս է դա պետք։ Բացի այն, որ Ռուսաստանը կարող է մեզ ավելի էժան գազ վաճառել»,- ասել է կինոռեժիսորը։