Քաղաքականություն
28.09.2020 | 19:43
Հայտնի բլոգեր Ալեքսանդր Լապշինը ցավում է այն բանի համար, որ Իսրայելը պարբերաբար զենք է մատակարարում Ադրբեջանին: Այս մասին նա գրել է Facebook-ի իր էջում։
«Երեկ Իսրայելում սկսվել է, այսպես կոչված, Դատաստանի օրը, որի ժամանակ հրեաներն ավանդաբար պետք է մեղքերի թողություն խնդրեն ու ներողություն խնդրեն բոլոր նրանցից, ում ցավ ու տառապանք են պատճառել։ Իսրայելում Դատաստանի օրը գրեթե կանգ է առնում տրանսպորտային միջոցների տեղաշարժը, չեն աշխատում ժամանցի վայրերը, դադարեցվում է հեռուստահաղորդումների ու ռադիոհաղորդումների հեռարձակումը։ Ավելին, այժմ նշվում է Եգիպտոսի ու Սիրիայի հետ 1973 թվականի արյունալի պատերազմի տարելիցը, երբ 2500 իսրայելցի զինվոր զոհվեց։
Սակայն անգամ երեկ՝ Դատաստանի օրը, և այսօր ողջ գիշեր Իսրայելի հարավում տեղակայված Ուվդայի օդանավակայանից թռել ու վայրէջք են կատարել ադրբեջանական Silk Way ընկերության՝ ռազմական բեռով օդանավերը, որոնք մահ են տարել Արցախի խաղաղ բնակիչներին։ Այս մասին իր թվիթթերյան միկրոբլոգում գրել է հայտնի իսրայելացի քաղաքական գործիչ ու 1996-2003 թթ Քնեսետի պատգամավոր Ռոման Բրոնֆմանը։
Ընկերներ ամաչում և ցավում եմ կատարվածի համար։
Սակայն ես նաև ուզում եմ հարցնել Իսրայելում Հայաստանի դեսպանին՝ ինչ-որ կերպ կարձագանքե՞ք այս փաստերին»,- գրել է Ալեքսանդր Լապշինը։
