ԼՂ-ում հակամարտության սրումը կապված չէ Մոսկվայի վրա ճնշում գործադրելու հետ․ Պեսկով

Կրեմլը չի կարծում, որ Լեռնային Ղարաբաղում հակամարտության սրումը կապված է Ռուսաստանի վրա ճնշում գործադրելու հետ։ Կրեմլի մամուլի խոսնակ Դմիտրի Պեսկովն այսպես է մեկնաբանել հարցը՝ արդյո՞ք ԼՂ հակամարտության սրման նպատակը Ռուսաստանի վրա ճնշում գործադրելը չէ ՝ Բելառուսում առաջացած խնդիրներից ու Ալեքսեյ Նավալնիի թունավորումից հետո, գրում է ՏԱՍՍ-ը։

«Ո՛չ, չենք դիտարկում նման տարբերակ»,- կարճ պատասխանել է Պեսկովը։

«Այս պահին մենք կոչ ենք անում բոլոր, նախ և առաջ՝ հակամարտության կողմերին առավելագույն զսպվածություն ցուցաբերել, հրաժարվել ռազմական գործողություններից ու ցանկացած քայլից, որը կարող է հանգեցնել իրավիճակի սրման, որն առանց այն էլ գտնվում է ռազմական բախման փուլում»,- նշել է Պեսկովը։

Ավելի վաղ էլ, հիշեցնենք, ՌԴ Անվտանգության խորհրդի ղեկավարի տեղակալ Դմիտրի Մեդվեդևը հայտարարել էր, որ անհրաժեշտ է օգտագործել բոլոր հնարավորությունները՝ Լեռնային Ղարաբաղի ճգնաժամը հաղթահարելու համար, ինչպես ԵԱՀԿ Մինսկի խմբի, այնպես էլ Ռուսաստանի հետ երկկողմ բանակցությունների միջոցով։

«Անհրաժեշտ է կիրառել բոլոր հնարավորությունները՝ ճգնաժամը հաղթահարելու համար, այդ թվում՝ ԵԱՀԿ Մինսկի խմբի համանախագահների մեխանիզմը, ինչպես նաև երկկողմ ձևաչափով՝ հաշվի առնելով այն, որ Հայաստանն ու Ադրբեջանը մեր հարևաններն ու մոտ գործընկերներն են»,- գրել է Մեդվեդևը։