Քաղաքականություն
28.09.2020 | 16:34
Եվրամիությունը տարածաշրջանի բոլոր խաղացողներին կոչ է անում նպաստել Լեռնային Ղարաբաղի հակամարտության գոտում դեէսկալացիային։ Այս մասին հայտարարարել է ԵՄ արտաքին քաղաքականության ծառայության պաշտոնական ներկայացուցիչ Պետեր Ստանոն Բրյուսելում կայացած ճեպազրույցի ժամանակ, գրում է ՏԱՍՍ-ը։
«Մենք հակամարտության կողմերին կոչ ենք անում դադարեցնել ռազմական գործողությունները, իսկ տարածաշրջանի բոլոր խաղացողներին՝ զերծ մնալ Լեռնային Ղարաբաղի հակամարտությունում ցանկացած ներգրավվածությունից»,- ասել է նա։
ԵՄ պաշտոնյան անդրադարձել է հակամարտության գոտի սիրիացի գրոհայինների տեղափոխելու մասին լուրերին։
«Մենք տեղյակ ենք Լեռնային Ղարաբաղի հակամարտության գոտի Թուրքիայի կողմից սիրիացի գրոհայինների տեղափոխման մասին հաղորդագրություններին, սակայն այդ տեղեկությունն ապացուցող փաստ դեռ չենք տեսել։ Սակայն այս համատեքստում էլ մենք կարող ենք միայն կրկնել մեր կոչը՝ զերծ մնալ ցանկացած արտաքին միջամտությունից»,- ասել է ԵՄ պաշտոնյան։
Ստանոն նաև հաստատել է, որ ԵՄ արտաքին գործերի ու անվտանգության քաղաքականության հարցերի գերագույն հանձնակատար Ժոզեպ Բորելը հեռախոսազրույցներ է ունեցել Հայաստանի ու Ադրբեջանի արտգործնախախարների հետ՝ ընդգծելով, որ հակամարտությունը չունի ռազմական լուծում։ Նշվում է, որ Բորելը հարցը դեռ չի քննարկել Ռուսաստանի ու Թուրքիայի արտգործնախարարների հետ։
Էմմա Չոբանյան
