Ինչպես են դպրոցները պատրաստվում դասերի մեկնարկին. դասասենյակների կահավորումից մինչև ախտահանման աշխատանքները դեռ ընթացքի մեջ են. ՏԵՍԱՆՅՈՒԹ

Սեպտեմբերի 14-ից հանրապետության բոլոր առաջին դասարանցիների համար, իսկ 15-ից՝ մյուս աշակերտների համար մեկնարկում է ուսումնական տարին։ Սակայն, համավարակով պայմանավորված, այս տարի այլ է ոչ միայն ուսումնական տարվա մեկնարկի օրը, այլև պայմաններն ու պահանջները։

Ինչպե՞ս են ուսուցիչները վերաբերվում նոր պայմաններին և արդյո՞ք դպրոցներն ավարտել են նախապատրաստական աշխատանքները․ Factor TV-ն պատահականության սկզբունքով եղել է մի քանի դպրոցում։

Երևանի Ստեփան Շահումյանի անվան թիվ 1 դպրոցի տնօրեն Աննա Եղյանի ուղեկցությամբ շրջեցինք դպրոցում։ Դասասենյակները հիմնականում պատրաստ են, բայց շաբաթ և կիրակի էլ են գալու․ վերջին շտկումներ կան, որ դեռ պիտի անեն։

Իսկ Անդրանիկ Մարգարյանի անվան թիվ 29 ավագ դպրոցը սեպտեմբերի 15-ից կընդունի ավագ օղակի աշակերտներին։ Դպրոցի փոխտնօրեն Անահիտ Նազարյանը դասասենյակներն է ցույց տալիս։ Ասում է՝ ժամանակատարը եղել է դասասենյակները ըստ ուղեցույցի կարգի բերելը։

Թիվ 5 հիմնական դպրոցում էլ հիմնականում 3-րդ հարկի դասասենյակներն են կահավորել․ դրանք ամենամեծն են։ Դպրոցի տնտեսվար Հարություն Հարությունյանն է մեզ ուղեկցում դասասենյակներ։

Սեպտեմբերմեկյան ավանդական միջոցառումներ դպրոցներում չեն լինելու՝ ո՛չ 15-ին, ո՛չ էլ 14-ին՝ առաջին դասարանցիների համար։ Նշում են՝ կուտակումներից են խուսափում։ Բոլոր դպրոցներում էլ գիտեն՝ դժվարություններ կլինեն, փորձելու են հաղթահարել: Կստացվի, թե՝ ոչ, արդեն ժամանակը ցույց կտա։

Մանրամասները՝ տեսանյութում։

Իրինա Մկրտչյան