30.06.2026 | 23:28
«Ուիմբլդոն»․ Կարեն Խաչանովը մեկնարկել է հաղթանակով
Մասշտաբային բողոքի երթ Բելառուսում․ իշխանությունները մայրաքաղաք են բերում հատուկ տեխնիկա
Քաղաքականություն
23.08.2020 | 16:32
Բելառուսական ընդդիմության աջակիցներն այսօր պատրաստվում են բողոքի երթ կազմակերպել մայրաքաղաք Մինսկում, որը կարող է դառնալ ամենամարդաշատը։
Իշխանություններն էլ ջրցան մեքենաներ, ցուցարարներին բերման ենթարկելու համար նախատեսված տրանսպորտային միջոցներ և հատուկ տեխնիկա են ուղարկել Մինսկի կենտրոն։ Գրում է DW-ն։
Կազմակերպիչներն առաջարկում են երթին միանալ նաև մեքենաներով, երկրի այլ շրջանների բնակիչներին հորդորում զուգահեռաբար հավաքներ անցկացնել իրենց բնակավայրերում։ Վեցերորդ անգամ Բելառուսի նախագահի պաշտոնը ստանձնած Ալեքսանդր Լուկաշենկոյի հրաժարականից բացի, ցուցարարները պահանջում են նաև բոլոր քաղբանտարկյալների ազատ արձակում և քրեական պատասխանատվություն խաղաղ ցուցարարների նկատմամբ խոշտանգումների ու սպանությունների մեղավորներին:
«Բելառուսական զինծառայողները չեն ցրի խաղաղ ցուցարարներին, եթե նույնիսկ նրանց հրամայեն դիմել այդ քայլին»,- համոզմունք է հայտնել նախագահի ընդդիմադիր թեկնածու Սվետլանա Տիխանովսկայան։
«Դա կլինի հանցագործություն, չէ՞ որ նրանք նույնպես Բելառուսի քաղաքացիներ են, բելառուսները չեն կարող ծեծել բելառուսներին: Ես ավելի քան վստահ եմ, որ և՛ բանակի, և՛ ոստիկանության մեծ մասը դա գիտակցում է»,- հավելել է Տիխանովսկայան։
