29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Բելառուսում մահացած են գտել ընտրությունների արձանագրությունը չստորագրած հանձնաժողովի անդամին
Քաղաքականություն
19.08.2020 | 10:31
Բելառուսի Գրոդնոյի շրջանում գտել են Վոլկովիսկ քաղաքի Բագրատիոնի անվան ռազմապատմական թանգարանի տնօրենի դին, որը օգոստոսի 9-ին տեղի ունեցած նախագահական ընտրություններից հետո հրաժարվել էր ստորագրել ընտրությունների արձանագրությունը, հայտնում է DW-ի ռուսական ծառայությունը:
29-ամյա Կոնստանտին Շիշմակովին գտել են անտառում՝ ծառից կախված, տեղեկացրել է տեղական որոնողափրկարարական ստորաբաժանումներից մեկը: Մարմնի վրա բռնության հետքեր չեն եղել:
Շիշմակովն անհետացել էր օգոստոսի 15-ին: Այդ օրը նա զանգահարել էր կնոջը, հայտնել, որ ցանկանում է աշխատանքից դուրս գալ և տուն է վերադառնում, սակայն այդպես էլ տուն չի հասել:
Շիշմակովի հոր փոխանցմամբ՝ օգոստոսի 9-ին տեղի ունեցած քվեարկությունից հետո որդին և տեղամասային ընտրական հանձնաժողովի ևս մեկ անդամ հրաժարվել են ստորագրել արձանագրությունը, բայց նրանց փոխարեն դա արել են ուրիշները:
Հիշեցնենք, որ նախագահական ընտրություններից հետո Բելառուսի տարբեր քաղաքներում բողոքի ցույցեր են ընթանում: Ցուցարարներն իրենց դժգոհությունն են արտահայտում ընտրությունների արդյունքներից, որոնց համաձայն՝ գործող նախագահ Ալեքսանդր Լուկաշենկոն վերընտրվել է 6-րդ անգամ՝ ստանալով ձայների 80.1%-ը, իսկ նրա հիմնական մրցակից Սվետլանա Տիխանովսկայան 10.12%-ը։ Ցույցերի սկսվելուց ի վեր ավելի քան 6700 մարդ է ձերբակալվել, հարյուրավոր մարդիկ վիրավորվել են: Երեք ցուցարար մահացել է:
