12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Սլովակիայում Բելառուսի դեսպանը հրաժարականի դիմում է ներկայացրել
Քաղաքականություն
18.08.2020 | 12:12
Սլովակիայում Բելառուսի դեսպան, նախագահի նախկին օգնական Իգոր Լեշչենյան հրաժարականի դիմում է ներկայացրել, հայտնում է tut.by-ը։
Մի քանի օր առաջ նա տեսաուղերձ էր հղել, որում իր աջակցությունն էր հայտնում Բելառուսում բողոքի ակցիաների մասնակիցներին:
«Ես իսկապես հրաժարականի դիմում եմ ներկայացրել։ Դա տրամաբանական քայլ է, քանի որ ես դեսպան եմ նշանակվել գործող նախագահի կողմից, և, ենթադրաբար, պետք է գործեմ նրա սահմանած քաղաքականության շրջանակում։ ԱԳՆ-ն կարծում է, որ իմ քաղաքացիական դիրքորոշումը դուրս է այդ շրջանակներից»,- նշել է Իգոր Լեշչենյան:
ԱԳՆ-ից փոխանցել են, որ արտակարգ և լիազոր դեսպանի հրաժարականի մասին որոշումն ընդունում է այն անձը, որը նրան նշանակել է, այսինքն՝ երկրի նախագահը:
«Ինչպես բոլոր բելառուսներին, այնպես էլ ինձ ապշեցրել են իմ համաքաղաքացիների խոշտանգումների և ծեծի դեպքերը»,- Լեշչենյան ասել էր նախքան հրաժարականի դիմում ներկայացնելը:
Հիշեցնենք, Բելառուսում օգոստոսի 9-ին կայացած նախագահական ընտրություններից հետո շարունակվում են բողոքի ակցիաները։
Ցուցարարներն իրենց դժգոհությունն են արտահայտում ընտրությունների արդյունքներից, որոնց համաձայն՝ գործող նախագահ Ալեքսանդր Լուկաշենկոն վերընտրվել է 6-րդ անգամ՝ ստանալով ձայների ավելի քան 80%-ը, իսկ նրա հիմնական մրցակից Սվետլանա Տիխանովսկայան ստացել է ձայների շուրջ 10%-ը։ Կիրակի օրը երկրում տեղի է ունեցել ամենազանգվածայինն ցույցը, որին մասնակցել է ավելի քան 200 000 քաղաքացի, իսկ երեկ Բելառուսում մեկնարկել է համազգային գործադուլ, որին միացել են նաև պետական հեռուստաալիքների աշխատակիցները: Ըստ պաշտոնական տվյալների՝ ավելի քան 6700 մարդ է ձերբակալվել այս օրերին: Վիրավորվել են հարյուրավոր մարդիկ, մահացել է երկու ցուցարար:
Նախօրեին ելույթ ունենալով Մինսկի գործարաններից մեկում՝ Լուկաշենկոն հայտարարել է, որ չի պատրաստվում հեռանալ պաշտոնից ճնշման տակ և նախագահական լիազորությունները կարող է փոխանցել միայն նոր Սահմանադրության ընդունումից հետո:
