Առաջ դատավորի պաշտոնն առավելություն ստանալու միջոց էր, հիմա դա չկա․ շատերը չեն ուզում դատավոր դառնալ․ ԲԴԽ անդամ. ՏԵՍԱՆՅՈՒԹ

Factor.am-ի հարցազրույցը Բարձրագույն դատական խորհրդի անդամ Գրիգոր Բեքմեզյանի հետ

-Պարոն Բեքմեզյան, ՍԴ դատավորի երեք թեկնածուները հայտնի են։ Նրանց շուրջ առկա քննարկումների որակն ինչպե՞ս եք գնահատում, և դրանք ինչպե՞ս են ազդում ընդհանուր առմամբ դատական համակարգի հեղինակության վրա։

-Որպես ԲԴԽ անդամ՝ չեմ ցանկանում որևէ կերպ մեկնաբանել Սահմանադրական դատարանում տեղի ունեցող իրադարձությունները։ Միշտ խուսափել եմ դրանից։ Միայն կարող եմ ասել, որ գործընթացն ինձ համար հասկանալի է այնքանով, որ հանրության հետաքրքրության շրջանակներում գտնվող գործընթաց է։ Եվ պարզ է, որ մեր հանրությունը պետք է ամենայն ուշադրությամբ և մանրակրկիտ ուսումնասիրեր դատավորների կենսագրությունը, անցած ճանապարհը, շահերի բախումները։ Այնպես որ ես այդտեղ որևէ արտառոց բան չեմ տեսնում։ Կլինեն տարբեր մեկնաբանություններ․ ծայրահեղ, ոչ ծայրահեղ։

-Նախորդ տարվա մայիսին վարչապետ Նիկոլ Փաշինյանը հայտարարեց, որ Հայաստանում գործող բոլոր դատավորները պետք է ենթարկվեն վեթինգի։ Ամիսներ անց ըստ էության պարզ դարձավ, որ խորքային վեթինգ չի լինելու, այլ դատավորների թեկնածուների բարեվարքության ստուգում է իրականացվելու։ Արդյոք սա արդյունավե՞տ գործիք է։

-Եթե խորը վեթինգ ասելով՝ հասկանում ենք բոլոր դատավորների լիազորությունների դադարեցումը, ապա այդպես մեր արդարադատությունը կոլապսի կմատնվի։ Մենք ունենք Կոռուպցիայի կանխարգելման հանձնաժողով, որն ուսումնասիրում է դատավորների կողմից ներկայացված հայտարարագրերը, շահերը։ Ունենք նաև Էթիկայի հանձնաժողով, որոնք վարույթներ են հարուցում։ Ունենք ապօրինի գույքի բռնագանձման օրենքը, որը թույլ է տալիս ստուգելու, թե դատավորն ինչպես է ձեռք բերել այս կամ այն գույքը։ Այս ամենը գալիս է բացահայտելու դատավորների գործունեությունը։

-Ձեր գործընկեր Հայկ Հովհաննիսյանը մեր տաղավարում ասում էր, որ պետք է արտերկրից բարձր որակավորում ունեցող դատավորների հրավիրել մեր երկիր՝ աշխատանքի։ Դուք ի՞նչ մոտեցում ունեք այս հարցում։

-Ես ավելի պրակտիկ եմ մտածում։ Իհարկե, գաղափարը հետաքրքիր է։ Բայց նախ պետք է դատավորները համաձայնեն գալ այստեղ, ապահովենք իրենց ֆինանսական պահանջները և այլն։ Բայց ինձ թվում է, որ դրա փոխարեն մենք կարող ենք շատ լավ կադրեր աճեցնել այստեղ։ Առաջ դատավորի պաշտոնն առավելություն ստանալու միջոց էր, հիմա դա չկա․ շատերը չեն ուզում դատավոր դառնալ։ Բացի այդ, շատ բարձր է հանրության ճնշումը․ ոչ բոլորն են ցանկանում դրա տակ մտնել և դատավոր կամ ԲԴԽ անդամ դառնալ։

Հարցազրույցն ամբողջությամբ՝ տեսանյութում:

Մերի Մարտիրոսյան