23.02.2026 | 23:30
Ադրբեջանը նույնպես հետաքրքրություն է հայտնել Եվրոպական խաղաղության գործիքակազմի շրջանակներում օգնություն ստանալու հարցում
Ադրբեջանի ԱԳՆ-ում բարձրաստիճան պաշտոնյաների նոր աղմկահարույց ձերբակալություններ են սպասվում
Քաղաքականություն
13.08.2020 | 16:29
Ադրբեջանի ԱԳՆ-ում պետական անվտանգության ծառայության կողմից իրականացված հակակոռուպցիոն ձերբակալությունների մասշտաբներն աճում են։ Այս մասին գրում է ադրբեջանական Minval.az-ը։
ԱԳՆ վարչության պետ Ֆարհադ Մոլազադեի ու հյուպատոսական վարչության պետ Ֆաիգ Բաղիրովի ձերբակալություններից հետո, սպասվում է, որ քննությանը ներագրավվելու են նաև այլ բարձրաստիճան պաշտոնյաներ ու նախարարի տեղակալներ։
Լրատվամիջոցին հայտնի են դարձել սենսացիոն փաստեր, որոնք բացահայտվել են քրեական գործերում։ Հետաքննությունը բացահայտել է ֆինանսատնտեսական խախտումներ, ինչպես նախարարությունում, այնպես էլ տարբեր երկրներում Ադրբեջանի դեսպանատներում, ներկայացուցչություններում ու հյուպատոսարաններում։ Ներկայում ֆինանսների նախարարությունը ստուգումներ է անցկացնում՝ պարզելու խախտումների իրական չափերը։ Նախնական տվյալներով՝ միլիոնավոր մանաթներ են յուրացվել։ Մոտ օրերին այս ամենի հետ կապված՝ կներգրավվեն մի քանի դիվանագետներ։ Սպասվում են աղմկահարույց ձերբակալություններ։
Նախօրեին երկու փոխարտգործնախարարները՝ Ռամիզ Հասանովն ու Նադիր Հուսեյնովը կանչվել են պետանվտանգության ծառայություն և երկար ժամանակ հարցաքննվել ԱԳՆ-ում տեղի ունեցած չարաշահումների կապակցությամբ։ Քննության արդյունքում մոտ օրերին սպասվում են ԱԳՆ բարձրաստիճան պաշտոնյաների ձերբակալություններ։
Հասանովը հերքել է այս լուրերը։ Նա նշել է, որ այլ ոլորտ է ղեկավարում և կապ չունի ձերբակալվածների հետ։ Հուսեյնովը աշխատում է փոխնախարարի պաշտոնում 2010թ-ից նոյեմբերի 24-ից։ Նա համակարգում է Հյուպատոսական բաժինը։ Իսկ ահա Հասանովի եղբայրը՝ Դուրսուն Հասանովը մի քանի տարի է Վրաստանում Ադրբեջանի դեսպանն է։ ԱԳՆ նախկին խոսնակ Էլհան Պոլուխովն էլ Հասանովի փեսան է։ Նա Բրազիլիայում Ադրբեջանի դեսպանն է։
Սոցիալական ցանցերի ադրբեջանական տիրույթում տեղեկություններ կան, որ Սերբիայում, Մոնտենեգրոյում, Բոսնիա և Հերցոգովինայում Ադրբեջանի դեսպանները, ինչպես նաև նախկին գլխավոր դատախազ Էլդար Հասանովը քննության տակ են։
Նշենք, որ հուլիսին Ադրբեջանի Պետական անվտանգության ծառայությունը ԱԳՆ-ում հատուկ գործողություն էր իրականացրել, որի ընթացքում ձերբակալվել էին մի շարք բարձրաստիճան պաշտոնյաներ պաշտոնական դիրքի չարաշահման, կաշառք ստանալու ու այլ անօրինական գործողություններ կատարելու համար։
Էմմա Չոբանյան
Կարդացեք նաև՝
Հաջորդը Զաքիր Հասանո՞վն է․ Ալիևի հրամանով աշխատանքից ազատվել է Ադրբեջանի պաշտպանության փոխնախարարը
Ադրբեջանի ԶՈՒ Գլխավոր շտաբի պետը մնաց իր պաշտոնում․ Զաքիր Հասանովը պաշտոնանկ կարվի՞
