11.01.2025 | 22:52
Վարչապետը առաջնահերթ է համարում խաղաղության գործընթացը, թվայնացումը և կոռուպցիայի դեմ պայքարը. ՏԵՍԱՆՅՈՒԹ
Ադրբեջանի ԶՈՒ Գլխավոր շտաբի պետը մնաց իր պաշտոնում․ Զաքիր Հասանովը պաշտոնանկ կարվի՞
Քաղաքականություն
21.07.2020 | 20:45
Ադրբեջանի Պաշպանության նախարարությունից հայտնում են, որ սոցիալական ցանցերում տարածված լուրերը, թե պաշտպանության նախարարի առաջին տեղակալ, ԶՈՒ Գլխավոր շտաբի պետ Նաջմեդդին Սադիկովը ազատվել է պաշտոնից, իրականությանը չեն համապատասխանում։
«Այդ հաղորդագրություններն ապատեղեկատվություն են, որոնք տարածվում են հակառակորդի կողմից։ ՊՆ-ի առաջին տեղակալ, Գլխավոր շտաբի պետ, գեներալ-գնդապետ Նաջմեդդին Սադիկովը ներկա պահին իր աշխատանքի վայրում է և կատարում է իր պարտականությունները»,- ասվում է հաղոդագրության մեջ։
Նշենք, որ Հայաստանի ու Ադրբեջանի սահմանին լարվածության ֆոնին սոցցանցերի ադրբեջանական տիրույթում պարբերաբար տեղեկություններ էին հրապարակվում Սադիկովի հնարավոր պաշտոնանկության մասին։ Սադիկովը Ադրբեջանի ԶՈՒ-ի Գլխավոր շտաբի պետի պաշտոնը զբաղեցնում է 1993 թվականից։ Համացանցում նրա գործունեությունից մեծ դժգոհություն կա։
Մասնավորապես, Սադիկովին մեղադրում են նաև գեներալ-մայոր Փոլադ Հաշիմովի մահվան մեջ։ Տեղեկություններ են շրջանառվում, թե Սադիկովը, իբր, ռուսական կողմին հայտնել է Հաշիմովի գտնվելու վայրը, նրանք էլ տեղեկությունը փոխանցել են հայկական կողմին։ Ըստ տարբեր լուրերի՝ Հաշիմովը պիտի փոխարիներ Սադիկովին Գլխավոր շտաբի պետի պաշտոնում։
Նշենք, որ Նաջմեդդին Սադիկովը պրոռուսական գործիչ է, պաշտոնը պահպանելն էլ շատերը կապում են Ռուսաստանի հետ ձեռք բերված համաձայնության հետ։ Լուրեր են տարածվում նաև, որն Սադիկովն ադրբեջաներենին չի տիրապետում, շփվում է միայն ռուսերենով։
Քանի որ Սադիկովը մնաց իր պաշտոնում, հիմա էլ համացանցի ադրբեջանցի օգտատերերը դժգոհությունների սլաքն ուղղել են դեպի պաշտպանության նախարար Զաքիր Հասանովը։ Չի բացառվում, որ Էլմար Մամեդյարովից հետո հենց նա հրաժեշտ կտա պաշտոնին։
Հասանովի հեռանալու մասին խոսակցությունները, ի դեպ, շրջանառվում էին դեռ Հայաստանի ու Ադրբեջանին սահմանին տեղի ունեցած վերջին իրադարձություններից առաջ։ Մարտական գործողություններում Ադրբեջանի ձախողումների պատճառով նախարարի հեռանալու մասին խոսակցություններն ավելի են ակտիվացել։
Էմմա Չոբանյան
