Ունենք դրականորեն փոփոխված, արդյունավետ լուծումներ սահմանող նախագիծ. արդարադատության փոխնախարարը՝ ընտանեկան բռնության օրինագծի մասին

Ազգային ժողովի պետական-իրավական և մարդու իրավունքների պաշտպանության հարցերի մշտական հանձնաժողովի նիստում սկսվեց  «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրինագծի քննարկումը:

Արդարադատության փոխնախարար, հիմնական զեկուցող Վիգեն Քոչարյանն ընդգծեց՝  նախնական տարբերակը որոշակի փոփոխությունների է ենթարկվել:

«Ե՛վ անվանման, և՛ տարբեր դրույթների հստակեցման արդյունքում ունենք դրականորեն փոփոխված, արդյունավետ լուծումներ սահմանող նախագիծ: Օրենքը երեք նպատակ է հետապնդում, որոնք հստակ սահմանված են վերնագրում՝ ընտանիքում բռնության կանխարգելում, ընտանիքում բռնության ենթարկված անձանց պաշտպանություն և ընտանիքում համերաշխության վերականգնում»,- ասաց արդարադատության փոխնախարարը՝ նկատելով, որ նախագծի նախնական տարբերակում թեև երրորդ էլեմենտը՝ ընտանիքում համերաշխության վերականգնումը, նշված չէր, բայց մեխանիզմները կային:

Վիգեն Քոչարյանի հիմնական ելույթից հետո Հանրապետական խմբակցության պատգամավոր Ռուստամ Մախմուդյանը խնդրեց օրինագծում տեղ գտած մի քանի եզրույթներ հստակեցնել. «Այլ բռնի գործողություններ եզրույթի տակ ի՞նչ ենք հասկանում, ի՞նչ ենք հասկանում ֆիզիկական տառապանք ասելով»:

Փոխնախարարն արձագանքեց. «Այդ եզրույթը երկար տարիներ գոյություն ունի Քրեական օրենսգրքում և նույնկերպ էլ կմեկնաբանվի»:

ՀՀԿ-ական պատգամավորը օրինակով նույն հարցը հնչեցրեց. «Եթե երեխայի թևից քաշում են դա այլ բռնի գործողությո՞ւն է»:

Վիգեն Քոչարյանը պնդեց՝ երեխայի թևից քաշելու համար քրեական պատասխանատվության ոչ ոք չի ենթարկվի: