Հակամիջուկային հարթակը կոչ է արել հիշել ՀԱԷԿ-ին հարվածելու՝ Ադրբեջանի սպառնալիքի հետևանքների մասին

Թուրքիայում գործող Հակամիջուկային հարթակը ֆեյսբուքյան իր էջում հայտարարություն է տարածել, որում անդրադարձ է կատարվում նաև Ադրբեջանի կողմից Հայաստանում Մեծամորի ատոմակայանի վերաբերյալ սպառնալիքին։

«Վերահաստատում ենք ատոմակայաններից ձերբազատվելու մեր կոչը, որոնք ոչ մի հանրային օգուտ չունեն, այլ, ընդհակառակը, կրում են հսկայական կենսական ռիսկեր: Անընդունելի է վտանգի տակ թողնել մեր կյանքն ու կենսատարածքները։ Ցանկանում ենք, որպեսզի ատոմակայանների կառուցման նախագծերն անմիջապես դադարեցվեն և ատոմակայաններն ամբողջությամբ դուրս մղվեն մեր կյանքից ինչպես մեր երկրում, այնպես էլ աշխարհում:

Կոչ ենք անում Թուրքիայի իշխող «Արդարություն և զարգացում» կուսակցությանը՝ կառավարությանը հիշեցնել մեր երկրի և տարածաշրջանի համար Ադրբեջանի կողմից Մեծամորի ատոմակայանի վրա հարձակման ծանր հետևանքների մասին:

Պահանջում ենք, որպեսզի Ատոմային էներգիայի միջազգային գործակալությունը և ՄԱԿ-ն անհապաղ կանխարգելիչ միջոցներ ձեռնարկեն ատոմակայանի նկատմամբ Ադրբեջանի կառավարության սպառնալիքների դեմ»,- մասնավորապես ասվում է հայտարարությունում:

Հիշեցնենք՝ Ադրբեջանից Հայաստանին սպառնացել էին հրթիռակոծել Մեծամորի ատոմային էլեկտրակայանը: Հայտարարությունն արել էր Ադրբեջանի պաշտպանության նախարարության մամուլի ծառայության ղեկավարը։

«Հայկական կողմը չպետք է մոռանա, որ առավել ժամանակակից հրթիռային համակարգերը, որոնք գտնվում են ադրբեջանական բանակի զինանոցում, կարող են մեծ ճշգրտությամբ հարվածել Մեծամորի ԱԷԿ-ին, ինչը կհանգեցնի մեծ աղետի Հայաստանի համար»,- հայտարարել էր նա:

Նելլի Մելքոնյան