Դատարանը հետաձգեց Մարտի 1-ի գործով պաշտպանների՝ դատակոչի ցուցակը լրացնելու միջնորդությունների լուծումը․ ՏԵՍԱՆՅՈՒԹ

Երևանի ընդհանուր իրավասության դատարանը ՀՀ երկրորդ նախագահ Ռոբերտ Քոչարյանի և մյուսների գործով դատական նիստի ընթացքում հետաձգեց Մարտի 1-ի գործով պաշտպանների՝ դատակոչի ցուցակը լրացնելու միջնորդությունների լուծումը։

Ըստ նիստը նախագահող դատավոր Աննա Դանիբեկյանի՝ պաշտպանները չեն նշել այն հանգամանքը, որի բացահայտման համար անհրաժեշտ է լրացնել դատակոչի ցուցակը և հարցաքննել նշված անձանց:

«Ներկայացված միջնորդությունը պետք է հետազոտել գործում առկա ապացույցների հետազոտմամբ: Մեղադրական եզրակացության համապատասխան մասին վերաբերող ապացույցները հետազոտելուց հետո դատարանը կարող է լուծում տալ համապատասխան միջնորդությանը: Պաշտպան Միհրան Պողոսյանը հստակ չի մատնանշել այն հանգամանքները, որոնց բացահայտման համար, իր կարծիքով, անհրաժեշտ է դատարան հրավիրել միջնորդությունում նշված անձանց, ինչը համապատասխան միջնորդություն ներկայացնող անձի պարտավորությունն է։ Մասնավորապես, պաշտպանը նշել է, որ կան որոշ հանգամանքներ, որոնց բացահայտման համար է անհրաժեշտ նշված անձանց հարցաքննությունը՝ միաժամանակ ասելով, որ չի կարող հրապարակել քրեական գործի տվյալները։ Հաշվի առնելով դա՝ դատարանը գտավ, որ քրեական գործի փաստական հանգամանքները հետազոտելուց հետո միայն կարող է պարզել, թե որոնք են այդ հանգամանքները, եթե պաշտպանը պատճառաբանի դա, և գործում առկա ապացույցները հետազոտելուց հետո կարող է հանգել հետևության՝ անհրաժեշտ են լրացուցիչ ապացույցներ, թե՝ ոչ»,- նշեց Աննա Դանիբեկյանը։

Անդրադառնալով Ռոբերտ Քոչարյանի պաշտպաններից Հայկ Ալումյանի միջնորդությանը՝ դատարանն արձանագրեց, որ թեև պաշտպանը պատճառաբանել է այն, սակայն դարձյալ մեղադրանքի համապատասխան մասին վերաբերող ապացույցները հետազոտելուց հետո միայն դատարանը կարող է հետևության հանգել՝ Ալումյանի մատնանշած հանգամանքները պարզելու համար անհրաժեշտ են լրացուցիչ ապացույցներ, թե՝ ոչ:

«Դատարանը որոշեց պաշտպանների միջնորդությունների լուծումը հետաձգել և դրանց անդրադառնալ դատաքննությունը լրացնելու միջնորդությունների քննարկման փուլում»,- եզրափակեց Աննա Դանիբեկյանը։

Հիշեցնենք՝ Ռոբերտ Քոչարյանի և մյուսների պաշտպանները միջնորդել էին դատարանում հարցաքննության համար վկաների ցուցակը լրացնել և մի շարք անձանց ընդգրկել, մասնավորապես՝ ՍԴ անդամների և ԱԺ նախկին պատգամավորների:

Նելլի Մելքոնյան