«Երկիր» ռազմավարական ծրագրավորման հիմնադրամ է ստեղծվել․ հիմնադիրները Արծվիկ Մինասյանն ու Լիլիթ Գալստյանն են  

«Երկիր» ռազմավարական ծրագրավորման հիմնադրամ է ստեղծվել, որի նպատակն է՝ նպաստել Հայաստանում հասարակական-քաղաքական և սոցիալ-տնտեսական ոլորտների շարունակական արդիականացմանը՝ ազատության, արդարության, հավասարության, իրավունքի գերակայության ու համերաշխության գաղափարաբանական շեշտադրումներով։ Այս մասին ասվում է տարածված հաղորդագրությունում։

«Հիմնադրամի հիմնադիրներն են պետական-քաղաքական գործիչներ, տնտեսագիտության թեկնածու Արծվիկ Մինասյանը և բանասիրական գիտությունների թեկնածու Լիլիթ Գալստյանը:

Հիմնադրամը, ի թիվս այլնի, նպատակ ունի նպաստել ազգային ու համամարդկային արժեքների ամրապնդմանը, քաղաքական ու քաղաքացիական երկխոսության խթանմանը,  հանրային իշխանության արդյունավետության բարձրացմանը, սփյուռքյան կազմակերպությունների և գործիչների ներհայաստանյան ներգրավման մակարդակի բարձրացմանը, ժողովրդավարական գործընթացների զարգացմանը և այլն։

Հիմնադրամը մտադիր է իրականացնել համալիր վերլուծական աշխատանք, խթանել գիտակրթական առաջընթացը, կազմակերպել տարաբնույթ քննարկումներ, սեմինարներ, դասընթացներ, ինչպես նաև իրականացնել բնակչության կենսամակարդակի բարձրացմանը միտված աշխատանքներ։

Հատուկ ուշադրություն է դարձվելու հետինդուստրիալ հեղափոխությամբ պայմանավորված մարդկային կացութաձևի փոփոխություններին, արհեստական բանականության ընձեռնած հնարավորություններին և առաջ բերած մարտահրավերներին։ Հիշյալ նպատակների ու խնդիրների շրջագծում մշտապես կարևորվելու է երիտասարդության ամենատարբեր կարողականությունների զարգացմանը միտված ծրագրերը։

Առաջիկա երկու ամիսների ընթացքում հիմնադրամն առավելապես զբաղված կլինի ներքին կազմակերպական աշխատանքներով և գործընկեր միջազգային կազմակերպությունների հետ հարաբերությունների ու ծրագրերի մշակմամբ, ինչից հետո պատշաճ հանրային ակտիվությամբ կներկայանա հասարակությանը։

Հիմնադրամը գաղափարաքաղաքական առումով հարում է Հայ Յեղափոխական Դաշնակցությանը։ Հիմնադրամի տնօրեն է նշանակվել քաղաքագիտության ասպիրանտ Գևորգ Ղուկասյանը»,- ասվում է հաղորդագրությունում։