«Այդքան հարուստ չենք, որ այդ հողերը չօգտագործենք»․ Ինչո՞ւ կառավարությանը քննադատող ԲՀԿ-ն «կողմ» քվեարկեց արտագաղթածների հողերը աճուրդով վաճառելու օրենսդրական փոփոխությանը

ԱԺ ԲՀԿ խմբակցության պատգամավոր, Տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի նախագահ Վարդևան Գրիգորյանը Factor.am-ի հետ զրույցում պատասխանելով հարցին, թե ինչու կառավարությանն անխնա քննադատող ԲՀԿ-ն «կողմ» քվեարկեց Հայաստանից արտագաղթած ու ՀՀ քաղաքացիությունից հրաժարված անձանց հողերը հարկադիր աճուրդով վաճառելու վերաբերյալ օրենսդրական փաթեթին, ասաց, թե Հայաստանն այդքան հարուստ չէ, որ տարիներ շարունակ չօգտագործի այդ հողերը։

«Տարիներ շարունակ մարդիկ կարող են բացակայել հանրապետությունից, իսկ այդ հողերը դառնում են անպիտան։ Վտանգ կա, որ այդ հողերը հետագայում դուրս կգան օգտագործումից»,- նշեց ԲՀԿ-ական պատգամավորը։

Համաձայն «Հողային օրենսգրքում» արվող փոփոխության՝ ՀՀ քաղաքացիությունից հրաժարված անձինք կզրկվեն իրենց սեփական գյուղատնտեսական հողերից, եթե դրանք չվաճառեն 1 տարվա ընթացքում: Հակառակ դեպքում հողերի հարկադիր աճուրդի հարցով կզբաղվեն համայնքապետերը: Հարցն այն է, թե այս փոփոխությունը ինչպե՞ս է հասնելու, ասենք, Ռուսաստանի Չուկոտկայի գյուղերից մեկն արտագաղթած հայ ընտանիքին և ինչպե՞ս են նրանք տեղեկանալու, որ կորցնում են իրենց սեփականությունը:

ԲՀԿ-ական պատգամավորը, սակայն, դա խնդիր չի համարում և վտանգ չի տեսնում, որ այդպիսով կկտրվի արտագաղթածների վերջին կապը Հայաստանի հետ: «Իրենց մեկ տարի ժամանակ է տրվում: Եթե իրենք չեն ուզում հայրենիք վերադառնալ, իրենց հողերը կվաճառվեն: Մենք էդքան հարսուտ չենք, որ այն հողակտորները, որ հանրավոր է օգտագործել, անուշադրության մատնենք»,- ասաց Գրիգորյանը։

Ինչ վերաբերում է վերջին շրջանում ԲՀԿ անխնա քննադատությանը՝ ուղղված Կարեն Կարապետյանի կառավարությանը, Վարդևան Գրիգորյանը պնդում է, որ դա քաղաքական խաղ չէ: «ԲՀԿ քննադատությունները քաղաքականության հետ մի կապեք»,- հորդորեց նա:

Մանրամասները դիտեք ԲՀԿ պատգամավոր Վարդևան Գրիգորյանի հետ Factor.am-ի հարցազրույցում:

Մարինե Խառատյան