Պարարտանյութը մի՛ պահեք, մի՛ դրեք տակներդ, տվեք գյուղացուն․ Էդմոն Մարուքյան

ԱԺ «Լուսավոր Հայաստան» խմբակցության ղեկավար Էդմոն Մարուքյանը Տաթև համայնքից ֆեյսբուքյան ուղիղ եթերի ժամանակ խոսեց գյուղատնտեսական խնդիրների մասին:

«Գյուղերում հանդիպումների արդյունքում պարզեցինք, որ ճիշտ էինք ասում, երբ խորհրդարանում բարձրաձայնում էինք պարարտանյութի, դիզվառելիքի, ժամանակին եղած գյուղնախարարության պետական աջակցությունների մասին, որոնք այժմ վերացվել են: Այստեղ մենք պարզեցինք, որ անցյալ տարվա և նախանցյալ տարվա կտրվածքով, երբ գյուղացիներն ստացել են պարարտանյութ, սելիտրա, ավելի շատ բերք են ստացել, քան՝ այս տարի»,- ասաց նա։

«Նրանք, ովքեր ունեցել են գումար ու ձեռք բերել պարարտանյութեր՝ կունենան բերք, նրանք, ովքեր այդ հնարավորությունը չեն ունեցել, պետական ծրագիրն էլ փակվել է՝ քիչ բերք են ունենալու։ Գյուղացիները պնդում են, որ որքան էլ թալանել են, ինչ են արել, ոնց են արել, ես չգիտեմ այդ պարարտանյութերի հարցով քրեական գործերով մարդիկ կա՞ն դատված, թե՝ ոչ, բայց որքան էլ, որ թալանել են, որոշ բան հասել է գյուղացիներին և օգտագործել ու շատ բերք են ստացել։ Պարզվում է, որ հեղափոխություն է եղել, չթալանված պարարտանյութերը պետք է հասնեին գյուղացուն, որ այս ցորենի հասկերը ավելի լավը լինեին, բայց քանի որ այն ժամանակ թալանել էին, իսկ հիմա չպետք է թալանեին՝ այդ ծրագիրը վերացվել է։ Գյուղացին մնացել է միայնակ իր արտերի, բանկերում ունեցած վարկերի և խնդիրների հետ, դրան գումարվել է պանդեմիան»,- նշեց պատգամավորը։