10.08.2026 | 19:24
20 հազարից ավելի խախտում՝ մեկ շաբաթում․ պարեկային ծառայության արդյունքները
ԿԸՀ-ն մերժեց Արման Բաբաջանյանի փոխարեն նոր պատգամավորի մանդատ տալու մասին ԼՀԿ-ի դիմումը. ՏԵՍԱՆՅՈՒԹ
Հասարակություն
08.07.2020 | 16:14
ՀՀ ԱԺ «Լուսավոր Հայաստան» խմբակցությունը դիմել է Կենտրոնական ընտրական հանձնաժողով՝ պահանջելով, որպեսզի վերականգնեն իրենց մանդատների թվաքանակը և իրենց տրամադրեն ևս մեկ մանդատ։ Այս դիմումի հիմքում ԼՀԿ-ն դրել է այն, որ իրենց հատկացվել է 18 մանդատ, սակայն իրենց պատգամավորներից մեկը՝ Արման Բաբաջանյանը, հայտարարեց, որ ինքն անկախ պատգամավոր է և ԼՀԿ-ից դուրս եկավ։
ԼՀԿ-ն պնդում է, որ Բաբաջանյանի դուրս գալուց հետո իրենց մանդատներից մեկն այժմ բաց է մնացել և այն պետք է լրացվի։ ԼՀԿ ներկայացուցիչ Դավիթ Խաժակյանը ԿԸՀ-ում ասաց, որ ԼՀԿ-ին 18 ամդատ տալը ժողովրդի կամընտրանքն է, և հիմա այդ կամընտրանքն ի կատար չի ածվում:
ԿԸՀ նախագահ Տիգրան Մուկուչյանը Խաժակյանից հետաքրքրվեց, թե ինչպես են պատկերացնում, որ մեկ մանդատ իրենց տրամադրելով պատգամավորների ընդհանուր թիվը ևս մեկով ավելանա։ Խաժակյանն ի պատասխան այս հարցի ասաց, որ ԿԸՀ-ն պետք է տարբերակներ քննարկի և տրամաբանությունն այն էր, որ Բաբաջանյանը պետք է մանդատը վայր դներ։
ԿԸՆ քննարկելով դիմումը որոշեց մերժել այն։
Ավելի ուշ, լրագրողների հետ զրույցում ԿԸՀ նախագահ Տիգրան Մուկուչյանը դա պատճառաբանեց նրանով, որ ԿԸՀ-ն կարող է մանդատ տրամադրել այն դեպքում, երբ այն թափուր է մնացել, իսկ այս դեպքում խնդրի լուծումը ԿԸՀ-ի գործառույթների մեջ չի մտնում։
Մանրամասները՝ տեսանյութում։
