08.11.2024 | 22:29
Ֆինլանդիան ՆԱՏՕ-ին առաջարկել է իր տարածքում ԱԹՍ-ների ռազմաբազա տեղակայել
ԱՀԿ-ն կորոնավիրուսի մասին իմացել է ոչ թե Չինաստանի կառավարությունից, այլ` իր աշխատակազմից
Քաղաքականություն
05.07.2020 | 20:42
ԱՄՆ-ում կորոնավիրուսով մինչ այժմ վարակվածների թիվը մոտենում է 2 միլիոն 900 հազարին, երբ ամբողջ աշխարհում վարակակիրները թիվը կազմում է ավելի քան 11 միլիոն:
Վերջին օրերի ընթացքում ԱՄՆ-ում այս վարակի տարածման արագության սրընթաց աճը ստիպեց, որ նախկինում սահմանափակումները մեղմած մի շարք նահանգներ վերադառնան խիստ ռեժիմին: Առողջապահության փորձագետները քննադատում են նախագահ Դոնալդ Թրամփին դիմակ կրելու կոչերն անտեսելու համար: Վերջին տեղեկությունների համաձայն, նախագահի որդու` Դոնալդ Թրամփ կրտսերի ընկերուհու մոտ ևս հայտնաբերվել է կորոնավիրուս:
Մեծ Բրիտանիայում անցկացված հետազոտությունների համաձայն հիվանդանոցներում կորոնավիրուսի գլխավոր տարածողները եղել են հավաքարարները, բեռնակիրները և գրասենյակային աշխատողները: Այստեղ մահացել են մինչ այժմ վարակված 284 հազար անձանցից 44 հազարը:
Բրազիլիան, որտեղ մինչ այժմ գրանցվել է մեկուկես միլիոն վարակակիր, թույլատրել է անցկացնել չինական արտադրության Սինովակ անվանումը կրող պատվաստանյութի կլինիկական փորձարկումներ: Երկրի նախագահ Ջաի Բոլսոնարոն, որն ավելի վաղ անտեսում էր կորոնավիրուսի վտանգը, ուրբաթ օրը հաստատեց մի օրենք, որը պահանջում է դիմակ կրել փողոցներում և հասարակական տրանսպորտում:
Այլ հաղորդագրությունների համաձայն, Առողջապահության համաշխարհային կազմակերպությունը փոփոխություն է մտցրել կորոնավիրուսի մասին առաջին անգամ տեղեկանալու շուրջ իր նախնանական հայտարարության մեջ: Այն հայտարարում է, որ այդ տեղեկությունը ստացել է Չինաստանում իր անձնակազմի կողմից, այլ ոչ Չինաստանի կառավարության պաշտոնատար անձանցից: ԱՀԿ-ի նախնական հայտարարություններում ասվում էր, թե վիրուսի մասին տեղեկությունները ստացվել են Չինաստանից` առանց նշելու Չինաստանի կառավարությունից, թե՞ այստեղ գտնվող իր գրասենյակից:
Հիշեցնենք, որ Միացյալ Նահանգները սուր քննադատության է ենթարկում ԱՀԿ-ին համաճարակի սկզբնական փուլում իրականացված «ոչ պատշաճ» աշխատանքների և Չինաստանի հետ գործակցության համար: Այդ պատճառով էր, որ ԱՄՆ-ը հայտարարեց ԱՀԿ-ից դուրս գալու որոշման մասին:
